മുന് ഇന്ത്യന് നായകനും ബിസിസിഐ പ്രസിഡന്റുമായ സൗരവ് ഗാംഗുലിയുടെ ജീവിതം സിനിമയാകുന്നു. വമ്പന് ബജറ്റില് ഒരുങ്ങുന്ന ചിത്രത്തിന് സമ്മതം മൂളിയ വിവരം ഗാംഗുലി തന്നെയാണ് വെളിപ്പെടുത്തിയത്.
“ശരിയാണ് എന്റെ ജീവിതം പറയുന്ന സിനിമ എടുക്കുന്നതിന് സമ്മതമാണെന്ന് ഞാന് അറിയിച്ചിട്ടുണ്ട്. ഹിന്ദിയിലായിരിക്കും സിനിമ പുറത്തിറങ്ങുക. ഈ ഘട്ടത്തില് സംവിധായകന് ആരാണെന്ന് പറയുക സാദ്ധ്യമല്ല. സിനിമയുമായി ബന്ധപ്പെട്ട എല്ലാ കാര്യങ്ങളും ശരിയാകാന് കുറച്ച് ദിവസങ്ങള് കൂടി എടുക്കും” ഗാംഗുലി പറഞ്ഞു.
ചിത്രം ഏറെക്കുറെ ഉറപ്പായതോടെ ഗാംഗുലിയുടെ കഥാപാത്രത്തെ ആരായിരിക്കും അവതരിപ്പിക്കുക എന്നതാണ് ഉയരുന്ന ചോദ്യം. രണ്ബീര് കപൂറിന്റെ പേരാണ് സജീവ പരിഗണനയിലുള്ളത്. ഗാംഗുലി തന്നെ രണ്ബീറിന്റെ പേര് നിര്ദേശിച്ചതായാണ് വിവരം. എന്നാല് മറ്റ് രണ്ട് താരങ്ങള് കൂടി പരിഗണനയില് ഉണ്ടെന്നാണ് അറിയുന്നത്.
200 മുതല് 250 കോടി വരെ ചെലവിലാണ് ചിത്രം ഒരുങ്ങുന്നതെന്നാണ് വിവരം. പ്രീ പ്രൊഡക്ഷന് ജോലികള് പൂര്ത്തിയായാല് ഉടന് തന്നെ സിനിമയുടെ ചിത്രീകരണം തുടങ്ങും.