ഐപിഎല്ലിന് ശേഷം വരാനിരിക്കുന്ന ദക്ഷിണാഫ്രിക്കക്കെതിരായ ടി20 ടീമിനെ ഈ മാസം 22 ന് പ്രഖ്യാപിച്ചേക്കും. നായകന് രോഹിത് ശര്‍മ, വിരാട് കോഹ്‌ലി, റിഷഭ് പന്ത്, ജസ്പ്രീത് ബുംറ, കെഎല്‍ രാഹുല്‍, മുഹമ്മദ് ഷമി തുടങ്ങി സീനിയര്‍ താരങ്ങള്‍ക്ക് ഇന്ത്യ വിശ്രമം അനുവദിക്കുമെന്നാണ് വിവരം.
പരിക്കേറ്റ രവീന്ദ്ര ജഡേജ, സൂര്യകുമാര്‍ യാദവ്, ടി നടരാജന്‍, വാഷിംഗ്ടണ്‍ സുന്ദര്‍ എന്നിവരും പരമ്പരക്കുണ്ടാകില്ല. ഈ സാഹചര്യത്തില്‍ പുതിയ നായകന് കീഴിലാകും ഇന്ത്യ പരമ്പരയ്ക്കിറങ്ങുക. സീനിയര്‍ താരങ്ങളുടെ ആഭാവത്തില്‍ നിരവധി യുവതാരങ്ങളെ ഇന്ത്യ പരിഗണിക്കുമെന്നാണ് വിവരം.
നായകനായി ശിഖര്‍ ധവാന്‍ എത്താനാണ് സാധ്യത കൂടുതല്‍. ഐപിഎല്ലില്‍ മികച്ച പ്രകടനമാണ് ശിഖര്‍ ധവാന്‍ നടത്തുന്നത്. സ്റ്റാര്‍ ഓള്‍റൗണ്ടര്‍ ഹര്‍ദിക് പാണ്ഡ്യ വൈസ് ക്യാപ്റ്റനായേക്കും. പരിക്കിനെത്തുടര്‍ന്ന് ഏറെ നാളുകളായി പുറത്തായിരുന്ന ഹര്‍ദിക് ഇടവേളക്ക് ശേഷം ശക്തമായ തിരിച്ചുവരവിന്റെ പാതയിലാണ്. ഐപിഎല്ലില്‍ ബാറ്റുകൊണ്ടും ബോളുകൊണ്ടും താരം ഭേതപ്പെട്ട പ്രകടനമാണ് കാഴ്ചവയ്ക്കുന്നത്.
പൃഥ്വി ഷാ, ഇഷാന്‍ കിഷന്‍, സഞ്ജു സാംസണ്‍, ദിനേശ് കാര്‍ത്തിക്, ഋതുരാജ് ഗെയ്ക്വാദ്, ശ്രേയസ് അയ്യര്‍ തുടങ്ങിയവര്‍ക്കും ടീമിലേക്ക് വിളിയെത്തും. എന്നാല്‍ കുല്‍ദീപ് യാദവിനെ ടീമിലേക്ക് പരിഗണിക്കുമോ എന്നതില്‍ ഉറപ്പില്ല. ജൂണ്‍ ഒന്‍പതിനാണ് പരമ്പര ആരംഭിക്കുന്നത്.
ഇന്ത്യയുടെ സാധ്യതാ ടീം: ശിഖര്‍ ധവാന്‍, പൃഥ്വി ഷാ, ഇഷാന്‍ കിഷന്‍, സഞ്ജു സാംസണ്‍, ശ്രേയസ് അയ്യര്‍, ഹര്‍ദിക് പാണ്ഡ്യ, ദിനേഷ് കാര്‍ത്തിക്, തിലക് വര്‍മ, ക്രുണാല്‍ പാണ്ഡ്യ, ശര്‍ദുല്‍ ഠാക്കൂര്‍, രവി ബിഷ്നോയ്, രാഹുല്‍ ചഹാര്‍, യുസ്വേന്ദ്ര ചഹാല്‍, പ്രസിദ്ധ് കൃഷ്ണ, ആവേഷ് ഖാന്‍, ഉമ്രാന്‍ മാലിക്, അര്‍ഷദീപ് സിംഗ്.