ഇന്ത്യന് ബാറ്റ്സ്മാന് ചേതേശ്വര് പൂജാരയെ “സ്റ്റീവ്” എന്ന പേര് വിളിച്ച് അപമാനിച്ചതിന്റെ കേട് തീരുംമുമ്പേ താരത്തിന് എതിരെ വീണ്ടും ആക്രോശവുമായി ഓസീസ് സ്പിന് ഇതിഹാസം ഷെയ്ന് വോണ്. ഗബ്ബയില് നടന്നുകൊണ്ടിരിക്കുന്ന നാലാം ടെസ്റ്റിന്റെ കമന്ററിക്കിടെ പൂജാരയുടെ ഹെല്മെറ്റ് എറിഞ്ഞ് തകര്ക്കൂ എന്ന വോണിന്റെ ആക്രോശമാണ് പുതിയ വിമര്ശനങ്ങള്ക്ക് വഴിവെച്ചിരിക്കുന്നത്.
അഞ്ചാം ദിനം 29ാം ഓവറിലായിരുന്നു വോണിന്റെ വിവാദ കമന്ററി. പേസര് ജോഷ് ഹേസല്വുഡിന്റെ ബോളുകളെ നേരിടുകയായിരുന്നു പുജാര. അഞ്ചാമത്തെ ബോള് ഹേസല്വുഡ് എറിയവെ “ഹെല്മറ്റ് തകര്ക്കാന് ശ്രമിക്കു, ചില ഷോര്ട്ട് ബോളുകള് എറിഞ്ഞ് അദ്ദേഹത്തെ അസ്വസ്ഥനാക്കൂ” എന്നായിരുന്നു വോണിന്റെ കമന്ററി.
പൂജാരയുടെ സ്ലോ ബാറ്റിംഗ് വോണിന്റെ നിയന്ത്രം നഷ്ടപ്പെടുത്തുകയായിരുന്നു. വോണിന്റെ വിവാദ കമന്ററിക്കെതിരെ നിരവധി വിമര്ശനങ്ങളാണ് സോഷ്യല് മീഡിയയില് ഉയരുന്നത്. ഓസീസ് താരങ്ങള് ഇതേ സമീപനം തന്നെയാണ് എല്ലായ്പ്പോഴും സ്വീകരിക്കുന്നതെന്നാണ് ഒരു വിമര്ശനം.
ഇത്തരം നെറികേടുകള്ക്ക് പേരു കേട്ടവരാണ് ഓസീസ് എന്നും അതുകൊണ്ടു തന്നെ ആശ്ചര്യം തോന്നുന്നില്ലെന്നും ആരാധകര് പറയുന്നു. നാലാം ടെസ്റ്റില് ഇന്ത്യ നിലവില് നാല് വിക്കറ്റ് നഷ്ടത്തില് 248 റണ്സെന്ന നിലയിലാണ്. 17 ഓവര് ശേഷിക്കെ ഇന്ത്യയ്ക്ക് ജയിക്കാന് 80 റണ്സ് കൂടിവേണം.