വിന്‍ഡീസിനെതിരായ ടി20 പരമ്പരയില്‍ നിരാശപ്പെടുത്തുന്ന സഞ്ജു സാംസണിന്റെ ശരിയായ പ്രശ്നം ചൂണ്ടിക്കാട്ടി പാകിസ്ഥാന്‍ മുന്‍ താരം കമ്രാന്‍ അക്മല്‍. അവസരത്തിനൊത്ത് ഉയരാനുള്ള മികവുള്ള താരമാണ് സഞ്ജുവെന്നും എന്നാല്‍ പ്രശ്നം സമീപനത്തിലാണെന്നും കമ്രാന്‍ അക്മല്‍ പറഞ്ഞു.
സഞ്ജു സാംസണ്‍ ഈ രീതിയില്‍ വിക്കറ്റ് നഷ്ടപ്പെടുത്തുന്നത് കാണുമ്പോള്‍ വളരെ നിരാശ തോന്നുന്നു. സഞ്ജുവിന് മികച്ച ഇന്നിംഗ്സ് കാഴ്ചവെക്കാനുള്ള അവസരമുണ്ടായിരുന്നു. നിരവധി ഓവറുകള്‍ ബാക്കി നില്‍ക്കവെയാണ് സഞ്ജു വിക്കറ്റ് നഷ്ടപ്പെടുത്തിയത്. പരിശീലകനും ക്യാപ്റ്റനും ആക്രമിച്ച് കളിക്കാന്‍ സഞ്ജുവിനോട് നിര്‍ദേശിച്ചിട്ടുണ്ടാവും. അതുകൊണ്ടാവാം അവന് അത്തരം ഷോട്ടുകള്‍ കളിച്ചത്.
അവനൊരു ക്ലാസ് ബാറ്റ്സ്മാനാണ്. അവസരത്തിനൊത്ത് ഉയരാനുള്ള മികവുമുണ്ട്. എന്നാല്‍ പ്രശ്നം സമീപനത്തിലാണ്. കൂടുതല്‍ പക്വത സഞ്ജു കാട്ടേണ്ടതായുണ്ട്. വലിയ ഇടവേളക്ക് ശേഷമാണ് സഞ്ജു ടീമിലേക്കെത്തുന്നത്. അതുകൊണ്ടുതന്നെ ടീമിലെ സീറ്റുറപ്പിക്കാനുള്ള പ്രകടനം കാഴ്ചവെക്കണം. എന്നാല്‍ അവന് അതിന് സാധിക്കാതെ പോയി- കമ്രാന്‍ അക്മല്‍ പറഞ്ഞു.
വിന്‍ഡീസിനെതിരെ സഞ്ജു തീരെ നിരാശപ്പെടുത്തുകയാണ്. ആദ്യ മത്സരത്തില്‍ ഫിനിഷര്‍ റോളില്‍ കളിച്ച സഞ്ജു 12 പന്തില്‍ 12 റണ്‍സുമായി പുറത്തായി. രണ്ടാം മത്സരത്തില്‍ ഏഴ് പന്ത് നേരിട്ട് ഏഴ് റണ്‍സെടുത്തും താരം കൂടാരം കയറി.