ഓസ്‌ട്രേലിയ്‌ക്കെതിരായ ടെസ്റ്റ് പരമ്പര വ്യാഴാഴ്ച തുടങ്ങാനിരിക്കെ പരിചയസമ്പന്നനായ പേസര്‍ ഇഷാന്ത് ശര്‍മയെ ഇന്ത്യ വല്ലാതെ മിസ് ചെയ്യുമെന്ന് മുന്‍ താരവും കമന്റേറ്ററുമായ സഞ്ജയ് മഞ്ജരേക്കര്‍. ടെസ്റ്റില്‍ കഴിഞ്ഞ കുറച്ചു വര്‍ഷങ്ങളായി ഇന്ത്യക്കു വേണ്ടി ഉജ്ജ്വല പ്രകടനം നടത്തുന്ന ഇഷാന്തിന്റെ റോള്‍ ആര് നിര്‍വ്വഹിക്കുമെന്നത് കുഴപ്പിക്കുന്ന കാര്യമാണെന്ന് മഞ്ജരേക്കര്‍ പറഞ്ഞു.
“മൂന്നാമത്തെ സപ്പോര്‍ട്ട് ബോളറെന്ന നിലയില്‍ ഇഷാന്തിന്റെ സാന്നിദ്ധ്യം ഇന്ത്യക്കു ആവശ്യമായിരുന്നു. മത്സരത്തില്‍ ബാറ്റ്സ്മാന്‍മാരെ നിരന്തരം സമ്മര്‍ദ്ദത്തിലാക്കി നിര്‍ത്തുകയെന്ന റോള്‍ ഇഷാന്താണ് ചെയ്യാറുള്ളത്. ഇത് ജസ്പ്രീത് ബുംറ, മുഹമ്മദ് ഷമി എന്നിവരെ വിക്കറ്റെടുക്കാന്‍ സഹായിക്കുകയും ചെയ്യുന്നു. ഓഫ് സ്റ്റമ്പിന് പുറത്ത് മികച്ച ഇക്കോണമി റേറ്റില്‍ നിരന്തരം ബൗള്‍ ചെയ്ത് ബാറ്റ്സ്മാന്‍മാരെ സമ്മര്‍ദ്ദത്തിലാക്കുന്നതില്‍ മിടുക്കനാണ് ഇഷാന്ത്.”
“ബോളറെന്ന നിലയില്‍ കഴിഞ്ഞ കുറച്ചു വര്‍ഷങ്ങളായി ഇഷാന്ത് ഏറെ വളര്‍ന്നിട്ടുണ്ട്. കൈക്കുഴ പന്തിന് പിറകിലേക്കാക്കി ബോള്‍ ചെയ്യാന്‍ കഴിയുന്നതാണ് ഇഷാന്തിനെ കൂടുതല്‍ അപകടകാരിയാക്കി മാറ്റിയിരിക്കുന്നത്. കരിയറിന്റെ തുടക്കകാലത്തു ഇഷാന്തിന് ഇതിനു സാധിച്ചിരുന്നില്ല.”
“കൈക്കുഴയുടെ പൊസിഷന്‍ ശരിയായി വന്നതോടെ ഇഷാന്തിനു പിച്ചില്‍ നിന്നും കൂടുതല്‍ മൂവ്മെന്റ് ലഭിക്കുന്നു. ഓഫ് സ്റ്റമ്പിന് പുറത്തേക്കു നിരന്തരം ബൗള്‍ ചെയ്യാന്‍ ഇഷാന്തിനു കഴിയുന്നു. ഇതാണ് വിക്കറ്റെടുക്കാനുള്ള അദ്ദേഹത്തിന്റെ ശേഷി വര്‍ദ്ധിപ്പിച്ചത്” മഞ്ജരേക്കര്‍ അഭിപ്രായപ്പെട്ടു.
ഐ.പി.എല്ലില്‍ ഡല്‍ഹി ക്യാപ്പിറ്റല്‍സിനായി കളിക്കുന്നതിനിടെയേറ്റ പരിക്കാണ് ഇഷാന്തിനു ഓസീസ് പര്യടനം നഷ്ടമാക്കിയത്. ഐ.പി.എല്ലിലും ഇഷാന്തിനു പാതിവഴിയില്‍ വെച്ച് പിന്മാറേണ്ടി വന്നിരുന്നു.