സീസണിൽ തങ്ങളുടെ അവസാന മത്സരത്തിൽ ചെന്നൈ സൂപ്പർ കിങ്സിനെതിരെ മികച്ച ജയം സ്വന്തമാക്കിയാണ് രാജസ്ഥാൻ റോയൽസ് തങ്ങളുടെ പോരാട്ടം അവസാനിപ്പിച്ചത്. ഓർക്കാൻ അധികമൊന്നും ഇല്ലാത്ത സീസണിൽ വെറും 4 മത്സരങ്ങളിൽ മാത്രമാണ് ടീമിന് ജയിക്കാൻ ആയത്. ആകെ സീസണിൽ എടുത്ത് പറയാൻ ഉള്ളത് യുവതാരങ്ങളുടെ പോരാട്ടവീര്യം മാത്രമാണ്.
ജയ്സ്വാളും വൈഭവ് സൂര്യവൻഷിയും സഞ്ജു സാംസണും എല്ലാം മികവ് കാണിച്ചപ്പോൾ ബാക്കി താരങ്ങൾ നിരാശപ്പെടുത്തി. അത് തന്നെ ആയിരുന്നു സീസണിൽ ടീമിന്റെ തോൽവികൾക്ക് കാരണവും. എന്തായാലും സീസണിൽ ടീമിന്റെ മത്സരങ്ങൾ അവസാനിച്ചു കഴിഞ്ഞപ്പോൾ യശ്വസി ജയ്സ്വാളിന്റെ സോഷ്യൽ മീഡിയ പോസ്റ്റ് കണ്ട ആരാധകർ അസ്വസ്ഥരാണ്. താരം രാജസ്ഥാനിൽ അടുത്ത സീസണിൽ ഉണ്ടാകില്ല എന്ന സൂചനയാണ് തന്നത് എന്നാണ് അവർ പറയുന്നത്.
ടീമിൽ റിയാൻ പരാഗിന് കൂടുതൽ പ്രാധാന്യം കൊടുത്ത് നായകനാക്കാൻ ശ്രമിക്കുന്നതും തന്നെയും സഞ്ജുവിനെയും അടക്കം ടീമിൽ ഒരുപാട് നാളായി മികവ് കാണിക്കുന്ന ആളുകളെ തഴയുന്നതുമൊക്കെ മനസിലാക്കിയ ജയ്സ്വാൾ സീസണിൽ ആകെ അസ്വസ്ഥൻ ആയിരുന്നു എന്നാണ് മനസിലാക്കുന്നത്. അദ്ദേഹം കുറിച്ചത് ഇങ്ങനെ:
” നന്ദി രാജസ്ഥാൻ റോയൽസ് എല്ലാത്തിനും. നമ്മൾ ആഗ്രഹിച്ച ഒരു സീസൺ അല്ല നമുക്ക് കിട്ടിയത്. എങ്കിലും ഒന്നിച്ചുള്ള മനോഹരമായ യാത്രയിൽ സന്തോഷവാനാണ്. അടുത്ത വെല്ലുവിളിക്കായി കാത്തിരിക്കുന്നു, ഭാവിയിൽ സംഭവിക്കുന്നത് എന്ത് തന്നെ ആണെങ്കിലും”
സഞ്ജുവിന് സീസണിൽ പരിക്ക് പറ്റിയപ്പോൾ ഉപനായകൻ എന്ന നിലയിൽ ജയ്സ്വാൾ ടീമിനെ നയിക്കും എന്നാണ് കരുതപെട്ടത് എങ്കിലും അത് ഉണ്ടായില്ല.