വിരാട് കോഹ്ലിയുടെ കട്ടൗട്ടിന് മുന്പില് ആടിനെ ബലി നല്കിയ ആര്സിബി ആരാധകരെ അറസ്റ്റ് ചെയ്ത് പൊലീസ്. കര്ണാടകയിലെ ചിത്രദുര്ഗ ജില്ലയിലെ മരിയമനഹള്ളി ഗ്രാമത്തിലാണ് ഈ വിചിത്ര സംഭവം നടന്നിരിക്കുന്നത്. ഞെട്ടിക്കുന്ന സംഭവം ഇവര് ക്യാമറയില് പകര്ത്തി സോഷ്യല് മീഡിയയില് പ്രചരിപ്പിച്ച ശേഷമാണ് സംഭവം പുറംലോകം അറിയുന്നത്. 20 സെക്കന്ഡ് ദൈര്ഘ്യമുളള വൈറല് വീഡിയോ മൂന്ന് യുവാക്കള് ചേര്ന്നാണ് ചിത്രീകരിച്ചത്.
ചിന്നസ്വാമി സ്റ്റേഡിയത്തില് നടന്ന മത്സരത്തില് ചെന്നൈ സൂപ്പര് കിങ്സിനെ തോല്പ്പിച്ച് ആര്സിബി വിജയം നേടിയതിന് പിന്നാലെയാണ് വീഡിയോ പുറത്തുവന്നത്. വീഡിയോയില് ഒരാള് വിരാട് കോഹ്ലിയുടെ കട്ടൗട്ടിന് മുന്നില് ഒരു ആടിനെ പിടിച്ചു നില്ക്കുന്നതും മറ്റൊരാള് ആവേശത്തോടെ സിഎസ്കെയ്ക്കെതിരായ ആര്സിബിയുടെ വിജയം പ്രഖ്യാപിക്കുന്നതും കാണാം.
അസ്വസ്ഥത ഉളവാക്കുന്ന മറ്റൊരു നിമിഷം, ആടിനെ ഒരു വെട്ടുകത്തി ഉപയോഗിച്ച് ഇവര് ക്രൂരമായി കൊല്ലുന്നതും അതിന്റെ രക്തം കോഹ്ലിയുടെ കട്ടൗട്ടില് തൊടുന്നതുമാണ്. ചടങ്ങ് നടക്കുമ്പോള് മൂന്നാമതൊരാള് ആടിനെ താഴേക്ക് പിടിച്ചു നില്ക്കുന്നതും കാണാം. മുന്പും കോഹ്ലിയോടുളള ആരാധകരുടെ സ്നേഹപ്രകടനങ്ങള് കാണിക്കുന്ന വീഡിയോസ് പുറത്തിറങ്ങിയിട്ടുണ്ട്. ഐപിഎലില് ഇത്തവണയെങ്കിലും ആര്സിബി കപ്പടിക്കാന് കാത്തിരിക്കുന്ന ആരാധകര് ഏറെയാണ്