വെടിക്കെട്ട് പ്രകടനവുമായി ടി 20 ലോകകപ്പ് ഇന്ത്യക്ക് നേടിക്കൊടുത്ത സഞ്ജുവിന്റെ അടുത്ത ലക്ഷ്യം 2026 ഐപിഎൽ കിരീടമാണ്. ചെന്നൈ സൂപ്പർ കിങ്സിലേക്ക് ചേക്കേറിയ താരം തന്റെ ആദ്യ സീസണിൽ തന്നെ ചെന്നൈക്ക് കപ്പ് നേടി കൊടുക്കും എന്ന പ്രതീക്ഷയിലാണ് ആരാധകർ. സാക്ഷാൽ എം എസ് ധോണിയോടൊപ്പം സഞ്ജു പാർട്ട്ണർഷിപ്പ് പടുത്തുയർത്തുന്നത് കാണാനാണ് ആരാധകർ ഒന്നടങ്കം കാത്തിരിക്കുന്നത്.
ഐപിഎല്ലിന് മുന്നോടിയായി ചെന്നൈ സൂപ്പർ കിംഗ്സിൽ എം എസ് ധോണിയുടെ റോളിനെക്കുറിച്ച് ചോദ്യങ്ങളുന്നയിച്ച് ദക്ഷിണാഫ്രിക്കൻ മുൻ നായകൻ എബി ഡിവില്ലിയേഴ്സ്. രാജസ്ഥാൻ റോയൽസിൽ നിന്ന് സഞ്ജു സാംസൺ ചെന്നൈ ടീമിലെത്തിയതോടെ ടീമിലെ ധോണിയുടെ സ്ഥാനം എവിടെയാണെന്ന ചോദ്യത്തിന് ധോണിക്ക് ഇനി ആ ടീമിൽ പ്രസക്തിയില്ലെന്നായിരുന്നു ഡിവില്ലിയേഴ്സിന്റെ മറുപടി. സഞ്ജുവും റുതുരാജും ചെന്നൈ സൂപ്പര് കിംഗ്സിനെ മുന്നോട്ടുനയിക്കാന് എന്തുകൊണ്ടും യോഗ്യരാണെന്ന് ഡിവില്ലിയേഴ്സ് പറഞ്ഞു.
‘കഴിഞ്ഞ രണ്ട് സീസണുകളിലായി ധോണി എട്ടാം നമ്പറിലോ ഒൻപതാം നമ്പറിലോ ആണ് ബാറ്റിംഗിന് ഇറങ്ങുന്നത്. ടീമിനെ നയിക്കുന്നതുമില്ല. ഇത്തരമൊരു സാഹചര്യത്തിൽ ധോണി പ്ലേയിംഗ് ഇലവനിൽ തുടരുന്നത് ശരിയായ കാരണങ്ങൾക്കൊണ്ടാണെന്ന് എനിക്ക് തോന്നുന്നില്ല’
ടെന്നീസ് ഇതിഹാസം റോജര് ഫെഡറര് കരിയറിന്റെ അവസാന കാലത്ത് വിരമിക്കണോ അതോ തുടരണോ എന്ന ആശയക്കുഴപ്പത്തിലായതുപോലെയാണ് ധോണിയുടെ കാര്യമെന്നും ഡിവില്ലിയേഴ്സ് പറഞ്ഞു. ധോണിയെ ഒരിക്കലും അത്തരമൊരു സാഹചര്യത്തില് കാണാന് താന് ആഗ്രഹിക്കുന്നില്ലെന്നും വിരമിച്ചാലും ധോണിക്ക് ടീമിനൊപ്പം മെന്ററായി തുടരാമല്ലോ എന്നും ഡിവില്ലിയേഴ്സ് വ്യക്തമാക്കി.