ഐപിഎൽ 2026-ൽ ചെന്നൈ സൂപ്പർ കിംഗ്സിന്റെ നായകസ്ഥാനം ഏറ്റെടുത്ത ഋതുരാജ് ഗെയ്ക്വാദിന് താൻ നൽകിയ ഉപദേശങ്ങളെക്കുറിച്ച് മനസ്സ് തുറന്ന് എം.എസ്. ധോണി. ഞായറാഴ്ച നടന്ന ഒരു പരിപാടിക്കിടെയാണ് ‘തല’ തന്റെ നേതൃത്വ ശൈലിയെക്കുറിച്ചും ടീമിന്റെ ഭാവിയെക്കുറിച്ചും സംസാരിച്ചത്.
താൻ ടീമിനെ നയിച്ച രീതി പിന്തുടരുന്നതിന് പകരം സ്വന്തം വ്യക്തിത്വം ഉയർത്തിപ്പിടിച്ച് ടീമിനെ മുന്നോട്ട് കൊണ്ടുപോകാനാണ് ഋതുരാജിനോട് ആവശ്യപ്പെട്ടതെന്ന് ധോണി വെളിപ്പെടുത്തി. ഫുട്ബോളിനെപ്പോലെയല്ല ക്രിക്കറ്റെന്നും ഇവിടെ തീരുമാനങ്ങൾ എടുക്കേണ്ടത് കോച്ചല്ല, മറിച്ച് ക്യാപ്റ്റനാണെന്നും ധോണി ഓർമ്മിപ്പിച്ചു. “സിഎസ്കെയെ എങ്ങനെ നയിക്കണമെന്ന് റുതുരാജിന് തീരുമാനിക്കാം. എന്റെ ചില രീതികൾ അവൻ സ്വീകരിച്ചേക്കാം, പക്ഷേ ഓരോ വ്യക്തിയും വ്യത്യസ്തരാണ്. നിന്റെ ശൈലി എന്താണോ അത് നടപ്പിലാക്കാൻ നിനക്ക് പൂർണ്ണ സ്വാതന്ത്ര്യമുണ്ടെന്ന് ഞാൻ അവനോട് പറഞ്ഞു.”
താക്കോൽ സ്ഥാനത്തിരിക്കുന്ന ഒരാൾക്ക് നൽകുന്ന നിർദ്ദേശങ്ങൾ ഒരിക്കലും ഉത്തരവുകളാകരുത് എന്ന് ധോണി വിശ്വസിക്കുന്നു. “ഞാൻ പത്ത് ഉപദേശങ്ങൾ നൽകിയാൽ അതിൽ ഒന്ന് പോലും അനുസരിക്കാതിരിക്കാനുള്ള അവകാശം ഋതുരാജിനുണ്ട്. ഒരു ലീഡർ എന്ന നിലയിൽ ലഭ്യമായ വിഭവങ്ങൾ എങ്ങനെ ഉപയോഗിക്കണമെന്ന് അവൻ തന്നെ തീരുമാനിക്കണം. ആ ഉത്തരവാദിത്തം അവന്റേതാണ്.”
തന്റെ ആരാധകവൃന്ദത്തെക്കുറിച്ചും സോഷ്യൽ മീഡിയ ഫോളോവേഴ്സിനെക്കുറിച്ചും ധോണിക്ക് വ്യക്തമായ കാഴ്ചപ്പാടുണ്ട്. “ആരാധകരെ വശീകരിക്കാനോ ഫോളോവേഴ്സിനെ കൂട്ടാനോ ഞാൻ ഒരിക്കലും ശ്രമിച്ചിട്ടില്ല. നമ്മൾ എപ്പോഴും ആധികാരികമായി ഇരിക്കുക എന്നതാണ് പ്രധാനം. നിങ്ങൾ നിങ്ങളായിത്തന്നെ ഇരിക്കുമ്പോൾ ആളുകൾ നിങ്ങളെ സ്നേഹിച്ചു തുടങ്ങും.” ധോണി പറഞ്ഞു.