താൻ ടെസ്റ്റ് ടീം ക്യാപ്റ്റനായിരുന്ന സമയത്ത് ഇന്ത്യൻ ടീം തുടർച്ചയായി തോൽവികൾ ഏറ്റുവാങ്ങിയ സമയത്തെ കുറിച്ച് പറഞ്ഞ് എംഎസ് ധോണി. 2011-2012 സീസണിൽ വിദേശത്ത് നടന്ന പരമ്പരകളിൽ ധോണിക്ക് കീഴിൽ ഇന്ത്യൻ ടീമിന് വലിയ തിരിച്ചടിയാണുണ്ടായത്. ഏകദിന ലോകകപ്പ് കിരീടം നേടിയതിന് പിന്നാലെ ഇംഗ്ലണ്ടിൽ നടന്ന പരമ്പരയിൽ 0-4നാണ് ഇന്ത്യ അവരോട് പരാജയപ്പെട്ടത്. പിന്നീട് ഓസ്ട്രേലിയയോട് അവരുടെ നാട്ടിൽ വച്ച് 0-3നും ഇന്ത്യക്ക് പരമ്പര നഷ്ടമായി.
2011-2012 സീസണിൽ ഏവേ മത്സരങ്ങളിൽ തന്റെ ക്യാപ്റ്റൻസിയിൽ ഇന്ത്യ തുടർച്ചയായി തോറ്റതിന് കാരണം താൻ തന്നെയാണെന്ന് സ്വയം സമ്മതിക്കുകയാണ് ധോണി. “ഞാൻ എന്നെത്തന്നെ കുറ്റപ്പെടുത്തണം. ടീമിന്റെ നായകനാണ് ഞാൻ. പ്രധാന തെറ്റുകാരൻ ഞാനാണ്, കൂടുതൽ റൺസ് നേടാത്തത് ഉൾപ്പെടെ തീർച്ചയായും ഞാൻ എന്നെത്തന്നെ കുറ്റപ്പെടുത്തുന്നു. തന്ത്രങ്ങൾ കളിക്കളത്തിൽ നിങ്ങൾ ചെയ്യുന്ന ഒന്നാണ്, ഒരു മത്സരത്തിന്റെ ഫലം എല്ലാ കളിക്കാരുടെയും പ്രകടനത്തെയും ആശ്രയിച്ചിരിക്കുന്നു. ആത്യന്തികമായി പ്രകടനമാണ് പ്രധാനം”, ധോണി പറഞ്ഞു.
2014ൽ ആണ് ധോണി ടെസ്റ്റിൽ നിന്നും വിരമിച്ചത്. 90 ടെസ്റ്റ് മത്സരങ്ങളാണ് തന്റെ കരിയറിൽ താരം കളിച്ചിട്ടുളളത്. ഇത്രയും മത്സരങ്ങളിൽ നിന്നായി 4876 റൺസ് ധോണി നേടി. 38.09 ശരാശരിയിലും 59.11 സ്ട്രൈക്ക് റേറ്റിലുമാണ് ഈ നേട്ടം. വിക്കറ്റ് കീപ്പറെന്ന നിലയിൽ ടെസ്റ്റിൽ 294 പുറത്താക്കലുകളും ധോണിയുടെ പേരിലുണ്ട്. ടെസ്റ്റ് ക്രിക്കറ്റ് ചരിത്രത്തിലെ എറ്റവും മികച്ച കീപ്പർമാരിൽ ഒരാളായും ധോണി അറിയപ്പെടുന്നു.
