അരങ്ങേറ്റ മത്സരത്തിന് തൊട്ടുപിന്നാലെ അന്താരാഷ്ട്ര ക്രിക്കറ്റില് നിന്ന് ഇംഗ്ലണ്ട് സസ്പെന്ഡ് ചെയ്ത ഒല്ലി റോബിന്സണെ ഇന്ത്യയ്ക്കെതിരെ കളിപ്പിക്കണമെന്ന് മുന് താരം മൈക്കല് വോണ്. അരങ്ങേറ്റ മത്സരത്തില് തന്നെ രണ്ട് ഇന്നിംഗ്സുകളില് നിന്ന് താരം ഏഴ് വിക്കറ്റ് വീഴ്ത്തിയിരുന്നു.
ഒല്ലി റോബിന്സണ് ഇംഗ്ലണ്ടിന് വേണ്ടി ടെസ്റ്റ് ടീമിലേക്ക് തിരികെ എത്തുമെന്നാണ് പ്രതീക്ഷ. അത് സംഭവിക്കേണ്ടത് തന്നെയാണ്. ഇപ്പോള് ബോര്ഡ് എടുത്ത നടപടി ശരിയാണെങ്കിലും സ്ഥിരം വിലക്ക് ശരിയായ നടപടിയല്ലെന്നും താരത്തിനെ ഇന്ത്യയ്ക്കെതിരെയുള്ള മത്സരങ്ങള്ക്ക് പരിഗണിക്കണമെന്നും വോണ് വ്യക്തമാക്കി.
റോബിന്സന്റെ എട്ട് വര്ഷം മുമ്പുള്ള സെക്സിസ്റ്റ് റേസിസ്റ്റ് ട്വീറ്റുകള് അരങ്ങേറ്റത്തിന് പിന്നാലെ വിവാദമായതോടെയാണ് ഇംഗ്ലണ്ട് ബോര്ഡിന്റെ നടപടി. സംഭവത്തില് ഇംഗ്ലണ്ട് ബോര്ഡിന്റെ അന്വേഷണം നടക്കുന്നുണ്ട്. അതിന് ശേഷമാകും താരത്തിന്റെ കാര്യത്തില് അന്തിമ തീരുമാനം കൈക്കൊള്ളുക. അതുവരെ താരത്തിന് അന്താരാഷ്ട്ര മത്സരങ്ങളിലൊന്നും കളിക്കാനാവില്ല.
താരം പക്വതയില്ലാത്ത പ്രായത്തിലെ നടപടിയ്ക്ക് മാപ്പ് പറഞ്ഞുവെങ്കിലും ഇംഗ്ലണ്ട് ബോര്ഡ് താരത്തിനെ സസ്പെന്ഡ് ചെയ്യുകയായിരുന്നു. ഓഗസ്റ്റിലാണ് ഇന്ത്യ-ഇംഗ്ലണ്ട് ടെസ്റ്റ് പരമ്പര ആരംഭിക്കുന്നത്.