ഇന്ത്യ വലിയ പ്രതീക്ഷയോടെ വളര്ത്തിക്കൊണ്ടു വരുന്ന ഇടം കൈയന് പേസറാണ് അര്ഷദീപ് സിംഗ്. എന്നാല് സമീപകാലത്തെ താരത്തിന്റെ പ്രകടനം നിരാശപ്പെടുത്തുന്നതാണ്. പരിക്കിന്റെ ഇടവേളക്ക് ശേഷം തിരിച്ചെത്തിയ അര്ഷദീപിന് പഴയ മികവ് കാട്ടാനാവുന്നില്ല. പോരാത്തതിന് നിരവധി എക്സ്ട്രാസും താരം വഴങ്ങുന്നു, പ്രത്യേകിച്ചും നോബാള് എറിയുന്നു. ഇപ്പോഴിതാ എന്താണ് അര്ഷദീപിന്റെ പ്രശ്നമെന്ന് ചൂണ്ടിക്കാട്ടി രംഗത്തെത്തിയിരിക്കുകയാണ് ഇന്ത്യന് മുന് പേസര് ലക്ഷ്മിപതി ബാലാജി.
നോബോളുകള് എറിയുന്നതിന്റെ പ്രശ്നം പെട്ടെന്ന് നിര്ത്താനുള്ള വഴികളൊന്നുമില്ല. അര്ഷദീപ് തന്റെ റണ്ണിംഗ് മാര്ക്ക് കൃത്യമായി അടയാളപ്പെടുത്തണം. കൂടാതെ സമ്മര്ദ്ദങ്ങളില് മികച്ച മനസാന്നിധ്യം കാട്ടണം.
അവന് നോബോളുകളെറിയുന്നത് വലിയ ആശങ്കയുണ്ടാക്കുന്ന കാര്യമാണ്. ബോളിംഗ് പരിശീലകനോടൊപ്പം സമയം ചിലവിട്ട് ഈ തെറ്റുകള് മാറ്റാന് ശ്രമം നടത്തണം. അവന് ശക്തമായി തിരിച്ചെത്തുമെന്നാണ് പ്രതീക്ഷിക്കുന്നത്
അര്ഷദീപിന് പഴയ താളം നഷ്ടമായിരിക്കുകയാണ്. അത് തിരിച്ചെത്തിക്കാനുള്ള ശ്രമമാണ് അവന് നടത്തേണ്ടത്. ഇടക്കിടെ ഓവര്സ്റ്റെപ്പിലൂടെ നോബോള് എറിയുന്നുണ്ടെങ്കില് എന്തൊക്കെയോ പ്രശ്നമുണ്ടെന്നും ഉടനെ അതിന് പരിഹാരം കാണണമെന്നുമാണ് മനസിലാക്കേണ്ടത്.
അല്ലാത്ത പക്ഷം ആത്മവിശ്വാസം നഷ്ടപ്പെടും. താളം കൂടുതല് നഷ്ടപ്പെട്ടുക്കൊണ്ടേയിരിക്കും. തന്റെ ലാന്റിംഗിലെ പ്രശ്നം ഗൗരവകരമായി ആലോചിച്ച് പരിഹരിക്കപ്പെടേണ്ടതാണ്- ബാലാജി പറഞ്ഞു.