ഐസിസി ട്വന്റി20 ബാറ്റ്‌സ്മാന്‍മാരുടെ റാങ്കിംഗില്‍ ഇന്ത്യന്‍ ക്യാപ്റ്റന്‍ വിരാട് കോഹ്ലിക്ക് കുതിപ്പ്. അതേസമയം, ഓപ്പണര്‍ കെ.എല്‍. രാഹുലിന്റെ സ്ഥാനത്തിന് ഇളക്കം തട്ടിയില്ല. ഇന്ത്യയുടെ ബോളര്‍മാരും ഓള്‍ റൗണ്ടര്‍മാരും റാങ്കിംഗില്‍ മുന്നേറ്റമുണ്ടാക്കുന്നതില്‍ പരാജയപ്പെട്ടു.
ഐസിസി പുറത്തുവിട്ട പുതിയ പട്ടിക പ്രകാരം നാലാം സ്ഥാനത്താണ് വിരാട് കോഹ്ലി. ഒരു പടി കയറിയാണ് വിരാട് നാലാമതെത്തിയത്. രാഹുല്‍ ആറാം സ്ഥാനം കാത്തുസൂക്ഷിച്ചു. ദക്ഷിണാഫ്രിക്കന്‍ ക്യാപ്റ്റന്‍ ക്വിന്റന്‍ ഡി കോക്കാണ് ഏറ്റവും നേട്ടമുണ്ടാക്കിയത്. നാല് സ്ഥാനങ്ങള്‍ മെച്ചപ്പെടുത്തി ഡി കോക്ക് കരിയറിലെ ഏറ്റവും മികച്ച റാങ്കായ എട്ടിലെത്തി. ശ്രീലങ്കയ്‌ക്കെതിരായ പരമ്പരയിലെ മികച്ച ബാറ്റിംഗ് ഡി കോക്കിനെ തുണയ്ക്കുകയായിരുന്നു. ഇംഗ്ലണ്ടിന്റെ ഡേവിഡ് മലാനാണ് റാങ്കിംഗിലെ ഒന്നാമന്‍.
ബോളര്‍മാരില്‍ ദക്ഷിണാഫ്രിക്കയുടെ ടബ്രൈസ് ഷംസി ആദ്യ സ്ഥാനത്ത് നിലയുറപ്പിച്ചു. ഇന്ത്യന്‍ ബോളര്‍മാരില്‍ ആരും ആദ്യ പത്തില്‍ ഇല്ല. ഓള്‍ റൗണ്ടര്‍മാരുടെ റാങ്കിലും സമാനസ്ഥിതി തന്നെ. അഫ്ഗാനിസ്ഥാന്റെ മുഹമ്മദ് നബിയാണ് ഓള്‍ റൗണ്ടര്‍മാരില്‍ നമ്പര്‍ വണ്‍.
