ഏകദിന ലോക കപ്പ് ഫൈനലില്‍ ദൗര്‍ഭാഗ്യം വേട്ടയാടിയപ്പോള്‍ ന്യൂസിലാന്‍ഡിന് നഷ്ടമായത് ഉറച്ച അവരുടെ കന്നി ലോക കിരീടമായിരുന്നു. ബെന്‍സ്‌റ്റോക്‌സും നിര്‍ഭാഗ്യവും അവസാന ഓവറുകളില്‍ വിരുന്നുകാരായെത്തിയതാണ് ന്യൂസിലാന്‍ഡിന് തിരിച്ചടിയായത്.
കിരീടം നഷ്ടമായപ്പോഴും ടൂര്‍ണമെന്റിന്റെ താരമായി തിരഞ്ഞെടുത്തത് കിവീസ് നായകന്‍ കെയ്ന്‍ വില്യംസണെ ആയിരുന്നു. ഒന്‍പത് മത്സരങ്ങളില്‍ 82.57 ബാറ്റിംഗ് ശരാശരിയില്‍ 578 റണ്‍സ് നേടിയ വില്ല്യംസണായിരുന്നു ടീമിന്റെ ഫൈനല്‍ പ്രവേശനത്തില്‍ നിര്‍ണായക പങ്ക് വഹിച്ചത്.
അതെസമയം സമ്മാനദാന ചടങ്ങിന് തൊട്ട് മുമ്പ് താനാണ് “പ്ലെയര്‍ ഓഫ് ദ സീരിസ്” എന്നറിഞ്ഞ വില്ല്യംസണ് അത് ആദ്യം വിശ്വസിക്കാനായില്ല. ഇക്കാര്യമറിഞ്ഞ് വില്ല്യംസണ് ആശ്ചര്യം പ്രകടിപ്പിക്കുന്നതിന്റെ വീഡിയോ സാമൂഹിക മാധ്യമങ്ങളില്‍ വൈറലാണ്.
വില്ല്യംസണാണ് “പ്ലെയര്‍ ഓഫ് ദ സീരിസ്” എന്ന് ഐ.സി.സി പ്രതിനിധി അദ്ദേഹത്തിന് അടുത്തെത്തി അറിയിക്കുകയായിരുന്നു. എന്നാല്‍ ഇക്കാര്യം കേട്ട വില്ല്യംസണ് അത് ഞാന്‍ തന്നെയോ എന്ന രീതിയിലാണ് അവരോട് പ്രതികരിച്ചത്. അവിശ്വസനീയത അദ്ദേഹത്തിന്റെ മുഖത്ത് നിന്നും വായിച്ചെടുക്കാമായിരുന്നു. ആ കാഴ്ച കാണാം