ഐപിഎലിൽ ഇന്നലെ നടന്ന മത്സരത്തിൽ മുംബൈ ഇന്ത്യൻസിനെ 7 വിക്കറ്റുകൾക്ക് പരാജയപ്പെടുത്തി പഞ്ചാബ് കിങ്സ്. ഇതോടെ പോയിന്റ് പട്ടികയിൽ ഒന്നാം സ്ഥാനത്തെത്താൻ ടീമിന് സാധിച്ചു. പ്രഭ്സിമ്രാന്റെയും ക്യാപ്റ്റൻ ശ്രേയസ് അയ്യരുടെയും മികവിലാണ് പഞ്ചാബിന് വിജയികനായത്.
80 റൺസ് നേടിയ പ്രഭ്സിമ്രാന്റെ പ്രകടനവും 66 റൺസ് നേടിയ ശ്രേയസ് അയ്യരുടെ വെടിക്കെട്ട് പ്രകടനവുമാണ് പഞ്ചാബിനെ വിജയത്തിലേക്ക് നയിച്ചത്. 39 പന്തിൽ രണ്ട് സിക്സറും 11 ഫോറുകളും അടക്കമാണ് സിമ്രാൻ 80 റൺസ് നേടിയത്. വെറും 35 പന്തിൽ നാല് സിക്സറും അഞ്ച് ഫോറുകളും അടക്കമായിരുന്നു ശ്രേയസിന്റെ ഇന്നിംഗ്സ്. പ്രിയാൻഷ് ആര്യ 15 റൺസും കൂപ്പർ കനോലി 17 റൺസും നേടി.
മത്സരത്തിൽ ഹാർദിക് പാണ്ഡ്യയെ പുറത്താക്കാൻ പഞ്ചാബ് താരം ശ്രേയസ് അയ്യർ എടുത്ത അത്ഭുത ക്യാച്ചാണ് ഇപ്പോൾ സോഷ്യൽ മീഡിയയിലെ പ്രധാന സംസാരവിഷയം. മുംബൈ ബാറ്റിംഗിനിടെ മാർക്കോ ജാൻസൺ എറിഞ്ഞ 18-ാം ഓവറിലെ മൂന്നാം പന്തിലായിരുന്നു സംഭവം. ക്രീസിൽ നന്നേ ബുദ്ധിമുട്ടിയ ഹാർദിക് പാണ്ഡ്യ ഒരു കൂറ്റനടിക്ക് ശ്രമിച്ചു. പന്ത് ബൗണ്ടറി കടക്കുമെന്ന് ഉറപ്പിച്ച നിമിഷം ലോംഗ്-ഓണിൽ നിന്ന് ഓടിയെത്തിയ ശ്രേയസ് അയ്യർ വായുവിൽ പറന്നുയർന്ന് പന്ത് കയ്യിലൊതുക്കി.
എന്നാൽ അതിർത്തി കടക്കുമെന്ന് ഉറപ്പായതോടെ പന്ത് വായുവിൽ വെച്ച് തന്നെ അരികിലുണ്ടായിരുന്ന സഹതാരമായ സേവ്യർ ബാർട്ട്ലെറ്റിന് എറിഞ്ഞുകൊടുക്കുകയായിരുന്നു. സ്കോർബോർഡിൽ ഇത് ബാർട്ട്ലെറ്റിന്റെ ക്യാച്ചാണെങ്കിലും ഈ വിക്കറ്റിന്റെ മുഴുവൻ ക്രെഡിറ്റും അയ്യർക്കുള്ളതാണ്. ക്യാച്ചിന് ശേഷം മുംബൈ ഗാലറിയോട് കയ്യടിക്കാൻ അയ്യർ ആവശ്യപ്പെടുന്നതും കാണാമായിരുന്നു. ഈ സീസണിലെ ഏറ്റവും മികച്ച ക്യാച്ചായാണ് ആരാധകർ ഇതിനെ വിലയിരുത്തുന്നത്.