ഗുജറാത്ത് ടൈറ്റന്‍സിനെതിരെ കൈയെത്തും ദൂരത്തുനിന്ന് വിജയം നഷ്ടപ്പെട്ടതിന്റെ ഞെട്ടലിലാണ് രാജസ്ഥാന്‍ റോയല്‍സ് നായകന്‍ സഞ്ജു സാംസണ്‍. അതിനാല്‍ത്തന്നെ മത്സരത്തിനു ശേഷമുള്ള ചോദ്യോത്തര വേളയില്ഡ പരാജയ കാരണം വ്യക്തമാക്കാന്‍ സഞ്ജു പ്രയാസപ്പെട്ടു. എവിടെയാണ് റോയല്‍സ് കളി തോറ്റത് എന്നുള്ള ചോദ്യത്തിനു സര്‍പ്രൈസ് മറുപടിയാണ് സഞ്ജു നല്‍കിയത്.
ഗെയിമിലെ അവസാനത്തെ ഓവറിലാണ് ഞങ്ങള്‍ തോറ്റത്. സത്യസന്ധമായി പറയുകയാണെങ്കില്‍ ഈയൊരു നിമിഷത്തില്‍ സംസാരിക്കുകയെന്നത് വളരെയധികം കടുപ്പമാണ്. മത്സരത്തില്‍ തോറ്റ ശേഷം സംസാരിക്കുകയെന്ന കടുപ്പമേറിയ ജോലിയാണ് ഒരു ക്യാപ്റ്റനുള്ളത്.
എവിടെയാണ് മല്‍സരം തോറ്റതെന്നു പറയുക ദുഷ്‌കരം തന്നെയാണ്. വികാരങ്ങളൊക്കെ അടങ്ങിയതിനു ശേഷം കുറച്ചു മണിക്കൂറുകള്‍ കഴിഞ്ഞാല്‍ എവിടെയാണ് ടീം തോറ്റതെന്നു ചിലപ്പോള്‍ എനിക്കു പറയാന്‍ സാധിച്ചേക്കും. ഇതിന്റെ ക്രെഡിറ്റ് ഗുജറാത്ത് ടൈറ്റന്‍സിനു നല്‍കിയേ തീരൂ. ഇതാണ് ഈ ടൂര്‍ണമെന്റിന്റെ വിജയം- സഞ്ജു വ്യക്തമാക്കി.
ജയ്പുരിലെ സവായ് മാന്‍സിങ് സ്റ്റേഡിയത്തില്‍ നടന്ന മത്സരത്തില്‍ മൂന്നു വിക്കറ്റിനാണ് ഗുജറാത്ത് റോയല്‍സിനെ പരാജയപ്പെടുത്തിയത്. അവസാന പന്തിലായിരുന്നു അവരുടെ ജയം. രാജസ്ഥാന്റെ സീസണിലെ ആദ്യ തോല്‍വിയാണിത്. സ്‌കോര്‍: രാജസ്ഥാന്‍ 20 ഓവറില്‍ മൂന്നിന് 196, ഗുജറാത്ത് 20 ഓവറില്‍ ഏഴിന് 199.
