പഞ്ചാബ് കിംഗ്സ് ഓള്റൗണ്ടര് സിക്കന്ദര് റാസ ഐപിഎല് പാതിവഴിയില് മതിയാക്കി മടങ്ങി. ബംഗ്ലാദേശിനെതിരായ വരാനിരിക്കുന്ന പരമ്പരയ്ക്കായി സിംബാബ്വെ ടീമിനൊപ്പം ചേരുന്നതിന് വേണ്ടിയാണ് താരം ഇന്ത്യ വിട്ടത്. സ്റ്റാര് ഓള്റൗണ്ടര് ഈ സീസണില് വെറും രണ്ട് മത്സരങ്ങളിലാണ് കളിച്ചത്.
തന്റെ വിടവാങ്ങല് വാര്ത്ത വെളിപ്പെടുത്താന് അദ്ദേഹം സോഷ്യല് മീഡിയയില് എത്തി. ‘എന്നെ സ്വന്തമാക്കിയതിന് ഇന്ത്യയ്ക്കും ഐപിഎല്ലിനും പഞ്ചാബ് കിംഗ്സിനും നന്ദി. ഇവിടുത്തെ ഓരോ നിമിഷവും ഞാന് ഇഷ്ടപ്പെട്ടു. ഇപ്പോള് ദേശീയ ഡ്യൂട്ടിക്കുള്ള സമയമാണ്. ഇന്ഷാ അല്ലാഹ് നമ്മള് ഉടന് വീണ്ടും കാണും’ റാസ കുറിച്ചു.
ടീം കോമ്പിനേഷനും നാല് വിദേശ താരങ്ങളുടെ നിയമവും കാരണം ലോകത്തിലെ ഏറ്റവും മികച്ച ടി20 ക്രിക്കറ്റ് താരങ്ങളിലൊരാളായ റാസയ്ക്ക് സ്ഥിരമായി പ്ലെയിംഗ് ഇലവനില് ഇടം പിടിക്കാനായില്ല.
സീസണില് രണ്ട് മത്സരങ്ങള് കളിച്ച താരം 43 റണ്സ് നേടി. വിക്കറ്റൊന്നും വീഴ്ത്തിയില്ല. സീസണില് പഞ്ചാബ് ഇതുവരെ ഒമ്പത് മത്സരങ്ങളില് മൂന്ന് വിജയങ്ങള് മാത്രമാണ് നേടിയത്.