അന്താരാഷ്ട്ര ക്രിക്കറ്റിനു പിന്നാലെ ഐപിഎല്ലിലും മോശം ഫോം തുടരുന്ന ലഖ്നൗ ജയന്റ്സ് നായകന്‍ കെ.എല്‍ രാഹുലിന് ഫോമിലേക്ക് തിരിച്ചെത്താന്‍ ടീം മാനേജ്‌മെന്റിന് ഉപായമോതി പാക് മുന്‍ താരം ഡാനിഷ് കനേരിയ. ക്യാപ്റ്റന്‍സിയുടെ അമിതഭാരം ഒഴിവാക്കുകയാണെങ്കില്‍ അതു രാഹുലിന്റെ സമ്മര്‍ദ്ദം കുറയ്ക്കുമെന്നും താരം ഫോമിലേക്ക് തിരിച്ചുവരുമെന്നും കനേരിയ നിരീക്ഷിച്ചു.
കെഎല്‍ ബാറ്റിംഗില്‍ തുടര്‍ന്നും മോശം തുടരുകയാണെങ്കില്‍ അദ്ദേഹത്തെ മാറ്റുന്നതിനെക്കുറിച്ച് ലഖ്നൗ സൂപ്പര്‍ ജയന്റ്സ് ടീം മാനേജ്മെന്റിനു ആലോചിക്കേണ്ടി വരും. ലീഗില്‍ ഒരുപാട് മല്‍സരങ്ങളുണ്ട്. ക്യാപ്റ്റനാവാന്‍ കഴിവുള്ള കളിക്കാരും ടീമില്‍ വേറെയുണ്ട്. രാഹുലിന് റണ്‍സ് നേടാന്‍ ബുദ്ധിമുട്ട് തുടരുകയാണെങ്കില്‍ അദ്ദേഹത്തെ നായകസ്ഥാനത്തു നിന്നും മാറ്റാവുന്നതാണ്.
പകരം നിക്കോളാസ് പൂരനെ നായകസ്ഥാനമേല്‍പ്പിക്കാം. അദ്ദേഹം വളര മികച്ച ക്യാപ്റ്റനാണ്. ഒരുപക്ഷെ ക്യാപ്റ്റന്‍സിയുടെ അമിതഭാരം ഒഴിവാക്കുകയാണെങ്കില്‍ അതു രാഹുലിന്റെ സമ്മര്‍ദ്ദം കുറയ്ക്കുകയും ബാറ്റിംഗില്‍ കൂടുതല്‍ ശ്രദ്ധിക്കാന്‍ സഹായിക്കുകയും ചെയ്യും. രാഹുലിനെ മധ്യനിരയിലേക്കു മാറ്റുകയും ചെയ്യാം- കനേരിയ പറഞ്ഞു.
ക്വിന്റണ്‍ ഡികോക്ക് വൈകാതെ ലഖ്നൗ സൂപ്പര്‍ ജയന്റ്സ് ടീമിലേക്കു തിരിച്ചെത്തുകയാണ്. അപ്പോള്‍ ടീം കോമ്പിനേഷന്‍ എങ്ങനെയാവുമെന്നു ചിന്തിക്കണം. കാരണം കൈല്‍ മയേഴ്സ് ഓപ്പണറായി മികച്ച പ്രകടനമാണ് നടത്തിക്കൊണ്ടിരിക്കുന്നത്. വളരെ മികച്ച തുടക്കമാണ് മയേഴ്സ് ടീമിനു നല്‍കുന്നത്. ഇതു എതിര്‍ ടീമിനെ വളരെയധികം സമ്മര്‍ദ്ദത്തിലാക്കുന്നു. അതുകൊണ്ടു തന്നെ അദ്ദേഹത്തെ ഈ റോളില്‍ നിന്നും മാറ്റാന്‍ കഴിയില്ല. മയേഴ്സിന്റെ ഓപ്പണിംഗ് പങ്കാളിയായി ഡികോക്ക് തന്നെ കളിക്കണം. വളരെ അപകടകാരികളായ ഓപ്പണിംഗ് ജോടികളായി ഇവര്‍ മാറുമെന്നും കനേരിയ കൂട്ടിച്ചേര്‍ത്തു.
