ഐപിഎലിലെ ഇന്നത്തെ ആദ്യ മത്സരത്തില്‍ രാജസ്ഥാന്‍ റോയല്‍സിനെതിരെ ടോസ് നേടിയ റോയല്‍ ചലഞ്ചേഴ്സ് ബാംഗ്ലൂര്‍ ബാറ്റിംഗ് തിരഞ്ഞെടുത്തു. പ്ലേഓഫ് സാധ്യതകള്‍ നിലനിര്‍ത്താന്‍ ഇരു ടീമുകള്‍ക്കും ജയം അനിവാര്യമായിരിക്കെ മികച്ചൊരു മത്സരം തന്നെ ഇന്ന് പ്രതീക്ഷിക്കാം. ഈ മത്സരം തങ്ങള്‍ക്ക് സെമി ഫൈനലിന് സമമാണെന്ന് റോയല്‍സ് നായകന്‍ സഞ്ജു സാംസണ്‍ ഇതിനോടകം പറഞ്ഞു കഴിഞ്ഞു.
സമ്മര്‍ദ്ദം തുടരുകയാണ്. ഞങ്ങള്‍ ഇതൊരു സെമിഫൈനലായാണ് പരിഗണിക്കുന്നത്. സത്യം പറഞ്ഞാല്‍, ഗുജറാത്തിനെതിരായ മത്സരമൊഴിച്ചാല്‍ ബാക്കിയുള്ള മത്സരങ്ങള്‍ ഞങ്ങള്‍ നന്നായി കളിച്ചിട്ടുണ്ട്. ടീമിലെ ഓരോ താരങ്ങളും അവരവരുടേതായ സംഭാവനകള്‍ നല്‍കികൊണ്ടേയിരിക്കുകയാണ്- ടോസിംഗ് വേളയില്‍ സഞ്ജു പറഞ്ഞു.
കഴിഞ്ഞ മത്സരത്തില്‍ കളിച്ച ടീമില്‍ ഒരു മാറ്റം വരുത്തിയാണ് റോയല്‍സ് ഇറങ്ങുന്നത്. സൂപ്പര്‍ പേസര്‍ ട്രെന്റ് ബോള്‍ട്ടിന് പകരം ആദം സാംപ ടീമിലിടം പിടിച്ചു. ആര്‍സിബിയും ടീമില്‍ രണ്ട് മാറ്റങ്ങള്‍ വരുത്തിയിട്ടുണ്ട്. ഹേസില്‍വുഡിന് പകരം പാര്‍നെലും ഹസരംഗയ്ക്ക് പകരം ബ്രേസ്വെലും ഇന്ന് കളിക്കും.
രാജസ്ഥാന്‍ റോയല്‍സ് പ്ലേയിംഗ് ഇലവന്‍: യശസ്വി ജയ്സ്വാള്‍, ജോസ് ബട്ട്ലര്‍, സഞ്ജു സാംസണ്‍, ജോ റൂട്ട്, ധ്രുവ് ജുറല്‍, ഷിമ്റോണ്‍ ഹെറ്റ്മെയര്‍, രവിചന്ദ്രന്‍ അശ്വിന്‍, ആദം സാംപ, സന്ദീപ് ശര്‍മ, കെഎം ആസിഫ്, യുസ്വേന്ദ്ര ചാഹല്‍
റോയല്‍ ചലഞ്ചേഴ്സ് ബാംഗ്ലൂര്‍ പ്ലേയിംഗ് ഇലവന്‍: വിരാട് കോഹ്ലി, ഫാഫ് ഡു പ്ലെസിസ്, അനൂജ് റാവത്ത്, ഗ്ലെന്‍ മാക്സ്വെല്‍, മഹിപാല്‍ ലൊമ്റോര്‍, ദിനേഷ് കാര്‍ത്തിക് , മൈക്കല്‍ ബ്രേസ്വെല്‍, വെയ്ന്‍ പാര്‍നെല്‍, കര്‍ണ്‍ ശര്‍മ, ഹര്‍ഷല്‍ പട്ടേല്‍, മുഹമ്മദ് സിറാജ്