കൊല്ക്കത്തയിലെ ഈഡന് ഗാര്ഡന്സില് ഐപിഎല് 56-ാം മത്സരത്തില് കൊല്ക്കത്ത നൈറ്റ് റൈഡേഴ്സ് രാജസ്ഥാന് റോയല്സുമായി ഏറ്റുമുട്ടുകയാണ്. ആരാധകരെ വിസ്മയിപ്പിക്കുന്ന അവിശ്വസനീയമായ പ്രകടനമാണ് രാജസ്ഥാന് നടത്തുന്നത്. ടോസ് നേടിയ രാജസ്ഥാന് ക്യാപ്റ്റന് സഞ്ജു സാംസണ് കൊല്ക്കത്ത നൈറ്റ് റൈഡേഴ്സിനെ ആദ്യം ബാറ്റ് ചെയ്യാന് ക്ഷണിച്ചു. കെകെആര് ഓപ്പണര്മാരായ ജേസണ് റോയിയും റഹ്മാനുള്ള ഗുര്ബാസും പവര്പ്ലേയില് പുറത്തായി.
ഇന്നിംഗ്സിന്റെ മൂന്നാം ഓവറില് ഷിമ്റോണ് ഹെറ്റ്മെയറിന്റെ ഒറ്റക്കൈ ക്യാച്ചിലാണ് കെകെആറിന്റെ ഓപ്പണിംഗ് കൂട്ടുകെട്ട് അവസാനിച്ചത്. ട്രെന്റ് ബോള്ട്ട് എറിഞ്ഞ മൂന്നാം ഓവറിലെ രണ്ടാം പന്ത് റോയ് ഡീപ് സ്ക്വയര് ലെഗിലേക്ക് പറത്തി.
ബൗണ്ടറിയില് നിലയുറപ്പിച്ച ഹെറ്റ്മെയര് തന്റെ മുഴുവന് ഉയരത്തിലേക്കും ചാടി വലതു കൈയില് പന്ത് പിടിച്ചു. ഇതിന്റെ വീഡിയോ ഇതിനോടകം സോഷ്യല് മീഡിയയില് വൈറലായി കഴിഞ്ഞു. ടൂര്ണമെന്റിലെ മികച്ച ക്യാച്ചുകളിലൊന്നില് ഇടംപിടിക്കുന്ന പ്രകടനമായിരുന്നു ഇത്.
പ്ലേ ഓഫ് പ്രതീക്ഷ കാക്കാന് രണ്ട് ടീമിനും ജയം അനിവാര്യമാണ്. കൊല്ക്കത്തയുടെ തട്ടകത്തിലാണ് മത്സരം. അവസാന മൂന്ന് പോരാട്ടങ്ങളും തോറ്റെത്തുന്ന രാജസ്ഥാന് ഇന്നത്തെ മത്സരം ഏറെ നിര്ണ്ണായകമാണ്.