ഇന്ത്യന് മുന് ഓപ്പണിംഗ് ബാറ്ററും കൊല്ക്കത്ത നൈറ്റ് റൈഡേഴ്സിന്റെ ക്യാപ്റ്റനുമായിരുന്ന ഗൗതം ഗംഭീറിനെ പുതിയ ഐപിഎല് ടീമായ ലഖ്നൗ ടീം മെന്ററായി നിയമിച്ചു. സിംബാബ്വെ ക്രിക്കറ്റ് ടീം മുന് ക്യാപ്റ്റന് ആന്ഡി ഫ്ളവറിനെ മുഖ്യ പരിശീലകനായി ടീം തിരഞ്ഞെടുത്തിനു പിന്നാലെയാണ് ഗംഭീറിന്റെ നിയമനവും.
കെകെആറിന്റെ ക്യാപ്റ്റനെന്ന നിലയില് ഐപിഎല്ലില് മികച്ച റെക്കോര്ഡ് ഒപ്പമുള്ള താരമാണ് ഗംഭീര്. അതിനാല് തന്നെ താരത്തിന്റെ സാന്നിധ്യം വര്ദ്ധിച്ചുവരുന്ന മത്സരാധിഷ്ഠിത ഐപിഎല് സാഹചര്യത്തില് ടീമിന് മുതല്ക്കൂട്ടാവുമെന്നാണ് കരുതുന്നത്. ഗംഭീറിന്റെ നായകത്വത്തില് കീഴിലാണ് 2012, 2014 വര്ഷങ്ങളില് കെകെആര് ഐപിഎല് കിരീടം ചൂടിയത്.
ലഖ്നൗ ടീമിന്റെ നായകനായി ഇന്ത്യന് താരം കെ.എല്. രാഹുല് എത്തിയേക്കുമെന്ന് റിപ്പോര്ട്ട്. കഴിഞ്ഞ സീസണില് പഞ്ചാബ് കിംഗ്സിന്റെ നായകനായിരുന്ന രാഹുല്, പുതിയ സീസണിന് മുന്നോടിയായി ടീം വിട്ടിരുന്നു. മുംബൈ ഇന്ത്യന്സിന്റെ മുന് വിക്കറ്റ് കീപ്പറും വെടിക്കെട്ട് ബാറ്ററുമായ ഇഷാന് കിഷന്, അഫ്ഗാനിസ്താന്റെ സ്റ്റാര് സ്പിന്നര് റാഷിദ് ഖാനുമാണ് ലേലത്തിന് മുമ്പ് ലഖ്നൗ ടീമിലെത്തിക്കുന്ന താരങ്ങള്.
ലഖ്നൗ, അഹമ്മദാബാദ് എന്നിവയാണ് പുതുതായി ടൂര്ണമെന്റിലേക്കു വന്നിരിക്കുന്ന ടീമുകള്. ഇവര്ക്ക് ലേലത്തിന് മുന്നേ മൂന്ന് താരങ്ങളെ നേരിട്ട് ടീമിലേക്ക് എത്തിക്കാം. ആരൊയൊക്കെയാണ് ഇത്തരത്തില് എത്തിക്കുന്നതെന്ന് ടീമുകള് ഈ മാസം തന്നെ ബിസിസിഐയെ അറിയിക്കേണ്ടതുണ്ട്.