ഇംഗ്ലണ്ടിലെ കഠിനമായ പര്യടനത്തോടെ ലോക ടെസ്റ്റ് ചാമ്പ്യൻഷിപ്പിന്റെ (WTC) പുതിയൊരു പരമ്പര ആരംഭിക്കാനിരിക്കെ, ടീം ഇന്ത്യക്ക് വലിയ വെല്ലുവിളിയാണ് മുന്നിൽ ഉള്ളത്. ജൂൺ 20 മുതൽ ആരംഭിക്കുന്ന അഞ്ച് മത്സരങ്ങളുള്ള ടെസ്റ്റ് പരമ്പരയിൽ ഇന്ത്യ ഇറങ്ങുമ്പോൾ അത് ടീമിൽ ഉള്ള യുവതാരങ്ങൾക്ക് വലിയ വെല്ലുവിളി സമ്മാനിക്കും. രണ്ട് അതികായരായ രോഹിത് ശർമ്മയുടെയും വിരാട് കോഹ്‌ലിയുടെയും സേവനം ഇല്ലാത്തതിനാൽ തന്നെ യുവതാരങ്ങൾ അവസരത്തിനൊത്ത് ഉയരാതെ രക്ഷയില്ല. കൂടാതെ, കഴിഞ്ഞ ബോർഡർ-ഗവാസ്‌കർ ട്രോഫിയിൽ ഇന്ത്യ 1-3 ന് പരാജയപ്പെട്ടപ്പോൾ ആ പരമ്പരക്കിടെ രവിചന്ദ്രൻ അശ്വിനും അന്താരാഷ്ട്ര ക്രിക്കറ്റിൽ നിന്ന് വിരമിക്കൽ പ്രഖ്യാപിച്ചിരുന്നു.
ഇന്ത്യൻ ക്രിക്കറ്റിലെ മെഗാസ്റ്റാറുകളുടെ സമീപകാല വിരമിക്കലിനെക്കുറിച്ച് പറഞ്ഞുകൊണ്ട്, മുൻ ഇന്ത്യൻ സ്പിന്നറും പരിശീലകനുമായ അനിൽ കുംബ്ലെ ബിസിസിഐയെ പരിഹസിച്ചുകൊണ്ട് വന്നിരിക്കുകയാണ്. ഈ താരങ്ങൾക്ക് അർഹമായ വിടവാങ്ങൽ ബിസിസിഐ നൽകിയില്ല എന്ന് പറയുകയും ചെയ്‌തു.
” ആദ്യം അശ്വിൻ, ഇപ്പോൾ രോഹിത് ശർമ്മ, പിന്നെ വിരാട് കോഹ്‌ലി. അവർ മൂന്ന് പേരും കളിക്കളത്തിൽ നിന്ന് ഒരു ഉചിതമായ യാത്രയയപ്പ് അർഹിച്ചിരുന്നുവെന്ന് ഞാൻ കരുതുന്നു. ബിസിസിഐ അത് ശ്രദ്ധിക്കണം ആയിരുന്നു. ഇത് സോഷ്യൽ മീഡിയ യുഗമാണെന്ന് എനിക്കറിയാം. എന്നാൽ സ്റ്റേഡിയത്തിൽ ആളുകൾ തടിച്ചുകൂടി ആർപ്പുവിളികളിൽ കിട്ടുന്ന യാത്രയപ്പിന്റെ സുഖം വേറെ കിട്ടില്ല.” അദ്ദേഹം പറഞ്ഞു
എന്തായാലും അർഹമായ യാത്രയപ്പ് കിട്ടി ഇല്ലെങ്കിലും തങ്ങളുടെ കരിയറിൽ സ്വരം നന്നായി നിൽക്കുന്ന സമയത്ത് തന്നെ ഇവരെല്ലാം പാട്ട് നിർത്തുക ആയിരുന്നു എന്ന് പറയാം.