വരാനിരിക്കുന്ന ഏഷ്യാകപ്പ് ക്രിക്കറ്റ് ടൂര്‍ണമെന്റില്‍ നിന്നും പിന്മാറാനൊരുങ്ങി ഇന്ത്യ. പാകിസ്ഥാനുമായുളള സംഘര്‍ഷത്തിന്റെ പശ്ചാത്തലത്തിലാണ് ബിസിസിഐ നിര്‍ണായക നീക്കത്തിനൊരുങ്ങുന്നത്. 2025 എഷ്യാകപ്പും പാകിസ്ഥാനില്‍ നടക്കാനിരിക്കുന്ന വനിത എമേര്‍ജിങ് ടീംസ് എഷ്യാകപ്പില്‍ നിന്നും ഇന്ത്യന്‍ ടീമുകള്‍ പിന്മാറുന്ന കാര്യം ബിസിസിഐ ഐസിസിയെ അറിയിച്ചിട്ടുണ്ടെന്നാണ് ദേശീയ മാധ്യമങ്ങള്‍ റിപ്പോര്‍ട്ട് ചെയ്യുന്നത്. എന്നാല്‍ ഇക്കാര്യങ്ങളിലൊന്നും ഔദ്യോഗിക സ്ഥിരീകരണം ഇതുവരെയുണ്ടായിട്ടില്ല.
പാകിസ്ഥാന്‍ ആഭ്യന്തര മന്ത്രിയും പാകിസ്ഥാന്‍ ക്രിക്കറ്റ് ബോര്‍ഡ് ചെയര്‍മാനുമായ മൊഹ്‌സിന്‍ നഖ്വിയാണ് നിലവില്‍ എഷ്യന്‍ ക്രിക്കറ്റ് കൗണ്‍സിലിനെ നയിക്കുന്നത്. ഇതിന് പിന്നാലെയാണ് എസിസിയുടെ ടൂര്‍ണമെന്റുകള്‍ ഒഴിവാക്കുന്ന കാര്യം ബിസിസിഐ പരിഗണിക്കുന്നത്. പാക് മന്ത്രി നയിക്കുന്ന എഷ്യന്‍ ക്രിക്കറ്റ് കൗണ്‍സിലിന്റെ ടൂര്‍ണമെന്റുകളില്‍ നിന്ന് തത്കാലം വിട്ടുനില്‍ക്കാനാണ് ഇന്ത്യയുടെ തീരുമാനം. പാകിസ്ഥാനെ ക്രിക്കറ്റിലും ഒറ്റപ്പെടുത്താനുളള നീക്കത്തിന്റെ ഭാഗമായാണ് ഈ തീരുമാനമെന്ന് ബിസിസിഐയുമായി അടുത്ത വൃത്തങ്ങള്‍ പറഞ്ഞു.
‘പാകിസ്താന്‍ മന്ത്രി അധ്യക്ഷനായ എസിസി സംഘടിപ്പിക്കുന്ന ഒരു ടൂര്‍ണമെന്റില്‍ ഇന്ത്യന്‍ ടീമിന് കളിക്കാന്‍ കഴിയില്ല. അതാണ് രാജ്യത്തിന്റെ വികാരം. വരാനിരിക്കുന്ന വനിതാ എമേര്‍ജിങ് ടീമുകളുടെ ഏഷ്യാ കപ്പില്‍നിന്ന് പിന്മാറുന്നതിനെക്കുറിച്ച് ഞങ്ങള്‍ എസിസിയെ വാക്കാല്‍ അറിയിച്ചിട്ടുണ്. കൂടാതെ അവരുമായി ബന്ധപ്പെട്ട ഭാവി പരിപാടികളിലെ ഞങ്ങളുടെ പങ്കാളിത്തവും നിര്‍ത്തിവച്ചിരിക്കുന്നു’, ബിസിസിഐ വൃത്തങ്ങള്‍ അറിയിച്ചു.
