ദക്ഷിണാഫ്രിക്കയ്ക്കെതിരായ ഒന്നാം ക്രിക്കറ്റ് ടെസ്റ്റ് ഈ മാസം 26 മുതല് സെഞ്ചൂറിയനിലെ സൂപ്പര് സ്പോര്ട്ട് പാര്ക്കില് നടക്കാനിരിക്കെ പിച്ചിലെ പച്ചപ്പ് കണ്ട് ഞെട്ടി ഇന്ത്യന് യുവതാരം ശ്രേയസ് അയ്യര്. ഇന്ത്യന് ടീമിന്റെ പരിശീലന സെഷനില് നിന്നുള്ള വീഡിയോയിലാണ് പിച്ചിലെ പച്ചപ്പിനെക്കുറിച്ചുള്ള ആശങ്ക ശ്രേയസ് പങ്കുവെച്ചത്.
‘പിച്ചില് ഒരുപാട് പുല്ലുണ്ട്. ഇവിടെ ബാറ്റ് ചെയ്യുകയെന്നത് ബാറ്ററെ സംബന്ധിച്ച് വലിയ വെല്ലുവിളി തന്നെയായിരിക്കും.’ എന്നായിരുന്നു ശ്രേയസിന്റെ വാക്കുകള്. താരത്തിന്റെ ഈ പരിഭവത്തില് പരിശീലകന് രാഹുല് ദ്രാവിഡ്് നല്കിയ ഉപദേശം ഒരു വരി മാത്രമായിരുന്നു. ‘നല്ല തീവ്രതയോടെ നിലവാരമുള്ള പരിശീലനംം നടത്തൂ’ എന്നാണ് അദ്ദേഹം ടീമിനോടു ആവശ്യപ്പെട്ടത്.
ശ്രേയസിന്റെ കരിയറിലെ ആദ്യത്തെ വിദേശ ടെസ്റ്റ് പരമ്പര കൂടിയാണിത്. ന്യൂസിലാന്ഡിനെതിരേ നാട്ടില് നടന്ന കഴിഞ്ഞ പരമ്പരയിലായിരുന്നു ശ്രേയസിന്റെ അരങ്ങേറ്റം. കാണ്പൂരില് നടന്ന ടെസ്റ്റില് ആദ്യ ഇന്നിംഗ്സില് സെഞ്ച്വറിയും രണ്ടാമിന്നിംഗ്സില് അര്ദ്ധ സെഞ്ച്വറിയുമായി ശ്രേയസ് തിളങ്ങിയിരുന്നു.
സെഞ്ചൂറിയനിലെ പിച്ചില് ദക്ഷിണാഫ്രിക്കയ്ക്കു ടെസ്റ്റില് വളരെ മികച്ച റെക്കോര്ഡാണുള്ളത്. ഇവിടെ ഇതുവരെ കളിച്ചിട്ടുള്ള 26 ടെസ്റ്റുകളില് 21ലും അവര് വിജയിച്ചിട്ടുണ്ട്. മൂന്നെണ്ണത്തില് സമനില വഴങ്ങിയ അവര് വെറും രണ്ടെണ്ണത്തില് മാത്രമേ പരാജയപ്പെട്ടിട്ടുള്ളൂ. 2014 ല് ഓസീസിനെതിരെയാണ് അവസാനമായി ദക്ഷിണാഫ്രിക്ക ഇവിടെ തോറ്റത്.