ഇംഗണ്ടിനെതിരെ നടന്ന ആദ്യ ടെസ്റ്റിൽ ഇന്ത്യക്ക് നാണംകെട്ട തോൽവി ഏറ്റുവാങ്ങിയിരിക്കുന്നു. അഞ്ച് വിക്കറ്റുകൾക്കാണ് ഇന്ത്യ ഇംഗ്ലണ്ടിനോട് പരാജയപ്പെട്ടത്. മത്സരത്തിൽ പൂർണാധിപത്യത്തിൽ നിന്നത് ഇന്ത്യയായിരുന്നെങ്കിലും രണ്ടാം ഇന്നിങ്സിലെ താരങ്ങളുടെ മോശമായ ബോളിങ് പ്രകടനം ഇന്ത്യക്ക് തിരിച്ചടിയായി. ഇതോടെ പരമ്പര ഇംഗ്ലണ്ട് ലീഡ് ചെയ്യുകയാണ്.
അടുത്ത ടെസ്റ്റ് മത്സരത്തിൽ ഇന്ത്യൻ താരം ജസ്പ്രീത് ബുംറ കളിച്ചേക്കില്ല എന്നാണ് ഇപ്പോൾ പുറത്ത് വരുന്ന റിപ്പോട്ടുകൾ. താരത്തിന്റെ അഭാവം ഇംഗ്ലണ്ട് സ്ക്വാഡിന്റെ ആത്മവിശ്വാസം വർധിപ്പിച്ചിരിക്കുകയാണ്. എന്നാൽ ബുംറ സർപ്രൈസായി ടീമിൽ ഇടം നേടിയേക്കാം എന്ന് പറഞ്ഞിരിക്കുകയാണ് മുൻ സൗത്ത് ആഫ്രിക്കൻ താരം എ ബി ഡിവില്യേഴ്സ്.
എ ബി ഡിവില്ലിയേഴ്സ് പറയുന്നത് ഇങ്ങനെ:
” അനുഭവ സമ്പത്ത് കുറഞ്ഞ ബോളിങ് നിരയാണ് ഇന്ത്യയുടേത്. ഈ സാഹചര്യത്തിൽ ജസ്പ്രീത് ബുംറയ്ക്ക് എല്ലാ ടെസ്റ്റ് മത്സരങ്ങളിലും കളിക്കാനാവില്ല എന്നത് നിർഭാഗ്യകരമാണ്. മാധ്യമങ്ങളെല്ലാം ഇക്കാര്യം പറയുന്നുണ്ട്. ഒരുപക്ഷേ ഇതെല്ലാം ഒരു സർപ്രൈസിന്റെ ഭാഗമാവാനും സാധ്യതയുണ്ട്”
എ ബി ഡിവില്ലിയേഴ്സ് തുടർന്നു:
” ബുംറയ്ക്ക് വിശ്രമം നൽകുന്നതിനെക്കുറിച്ച് ആലോചിക്കുന്നു എന്നാണ് ഇന്ത്യ പറയുന്നത്. എന്നാൽ ബുംറ ചിലപ്പോള് അഞ്ച് ടെസ്റ്റുകളും കളിച്ചേക്കും. അടുത്ത മത്സരത്തില് ഇംഗ്ലണ്ട് ബുംറയില്ലാത്ത ഇന്ത്യയെ നേരിടുന്നതിനെ കുറിച്ചായിരിക്കും ആലോചിക്കുക. അവരുടെ ഗെയിം പ്ലാനുകളും അങ്ങനെത്തന്നെയാവും. അവിടെയായിരിക്കും ഇന്ത്യയുടെ അപ്രതീക്ഷിത നീക്കം” എ ബി ഡിവില്ലിയേഴ്സ് പറഞ്ഞു.