ഓവലില്‍ ഇംഗ്ലണ്ടിനെതിരായ രോഹിത് ശര്‍മ്മയുടെ സെഞ്ച്വറി പ്രകടനത്തെ വാനോളം പ്രശംസിച്ച് മുന്‍ താരം ആകാശ് ചോപ്ര. ഇത് വലിയ നേട്ടങ്ങളിലേക്കുള്ള ആദ്യ പടി മാത്രമാണെന്നും ഇനിയും മികച്ച പ്രകടനങ്ങള്‍ രോഹിത്തിന്റെ ഭാഗത്ത് നിന്ന് ഉണ്ടാകുമെന്നും ചോപ്ര പറഞ്ഞു.
‘രോഹിത് ശര്‍മ സൂപ്പര്‍ഹിറ്റായിരിക്കുന്നു. നാട്ടിലെ ഏഴ് സെഞ്ച്വറി പ്രകടനങ്ങള്‍ക്ക് ശേഷം വിദേശത്തെ ആദ്യ ടെസ്റ്റ് സെഞ്ച്വറി രോഹിത് നേടിയിരിക്കുകയാണ്. എന്നാല്‍ ഇത് വലിയൊരു തുടര്‍ച്ചയുടെ തുടക്കം മാത്രമാണ്. രക്തത്തിന്റെ രുചി സിംഹം തിരിച്ചറിഞ്ഞു കഴിഞ്ഞു. ഇനിയവന്‍ നില്‍ക്കില്ല. കുതിപ്പ് തുടരുകയും സെഞ്ച്വറികള്‍ നേടുകയും ചെയ്യും.’
‘ഒരു വലിയ യാത്രയുടെ തുടക്കം മാത്രമാണിത്. അവനെ ഇവിടെ പിടിച്ചുകെട്ടുക പ്രയാസമാണ്. കാരണം പ്രതിസന്ധിയുള്ള പിച്ചുകളില്‍ അവന് മികവ് കണ്ടെത്തിയിരിക്കുന്നു. വലിയൊരു പരീക്ഷണം തന്നെയാണ് അതിജീവിച്ചിരിക്കുന്നത്’ ചോപ്ര പറഞ്ഞു.
വിദേശ മണ്ണിലെ ആദ്യ ടെസ്റ്റ് സെഞ്ച്വറിയാണ് രോഹിത് ഓവലില്‍ കുറിച്ചത്.
56 പന്തില്‍ 14 പന്തും ഒരു സിക്സും സഹിതം 127 റണ്‍സാണ് രോഹിത് നേടിയത്. രോഹിത്തിന്റെ പ്രകടനകരുത്തില്‍ ഇന്ത്യ രണ്ടാം ഇന്നിംഗ്സില്‍ മൂന്നു വിക്കറ്റ് നഷ്ടത്തില്‍ 270 റണ്‍സെന്ന നിലയിലാണ്. ഏഴു വിക്കറ്റും രണ്ടു ദിവസത്തെ കളിയും ബാക്കിയിരിക്കെ ഇന്ത്യയ്ക്ക് 171 റണ്‍സ് ലീഡാണുള്ളത്.