ഐപിഎലില് മുംബൈ ഇന്ത്യന്സിനെതിരെ ഹൈദരാബാദിന്റെ ഇഷാന് കിഷന്റെ പുറത്താവല് വാര്ത്തകളില് നിറഞ്ഞിരുന്നു. ഔട്ട് അല്ലാതിരുന്നിട്ടും അത് അപ്പീലിന് പോകാതെ ഡ്രസിങ് റൂമിലേക്ക് മടങ്ങുകയായിരുന്നു കിഷന്. ദീപക് ചാഹറിന്റെ ബോളില് വിക്കറ്റ് കീപ്പര് റിയാന് റിക്കല്ട്ടന് ക്യാച്ചെടുത്തായിരുന്നു കിഷന് പുറത്തായത്. എന്നാല് റിപ്ലെയില് പന്ത് ബാറ്റില് തട്ടിയിട്ടില്ലെന്ന് ശരിക്കും കാണാമായിരുന്നു. അമ്പയര് ഔട്ട് വിളിച്ചതിന് പിന്നാലെ താരം പ്രതികരിക്കുകയൊന്നും ചെയ്യാതെ മടങ്ങുകയായിരുന്നു. മുംബൈ കളിക്കാര് പോലും ഔട്ടിനായി വാദിച്ചിരുന്നില്ല. ഈ സമയത്തായിരുന്നു കിഷന് മടങ്ങിയത്.
ഇഷാന് കിഷന്റെ പുറത്തുപോവലിന് പിന്നാലെ താരത്തിനെതിരെ രസകരമായ ട്രോളുകളുമായി എത്തുകയാണ് ക്രിക്കറ്റ് ആരാധകര്. ‘കാവ്യ ചേച്ചിക്ക് അറിയാമോ, പണ്ട് ജാര്ഖണ്ഡിന് വേണ്ടി കളിക്കുമ്പോ ആര്ക്കും എന്നെ അറിയില്ലായിരുന്നു. അവിടുന്ന് എന്നെ സെലക്ട് ചെയ്ത് പത്തുപേര് അറിയുന്ന ഇന്നത്തെ കിഷന് ആക്കിയത് എന്റെ മുംബൈ ഇന്ത്യന്സാ എന്ന് വികാരഭരിതനായി കിഷന് പറയുന്ന തരത്തിലാണ് ഒരു ട്രോള് വന്നിരിക്കുന്നത്. ഉണ്ട ചോറിന് നന്ദി കാണിച്ചതാണെന്ന് കരുതിയാ മതി എന്നായിരുന്നു മറ്റൊരു ട്രോള്.
ഇന്നലത്തെ കളിയിലും ബാറ്റിങ്ങില് പരാജയമായിരുന്നു ഇഷാന് കിഷന്. നാല് പന്തുകള് നേരിട്ട താരം വെറും ഒരു റണ് മാത്രമാണ് നേടിയത്. ഈ സീസണില് രാജസ്ഥാന് റോയല്സിനെതിരെ ആദ്യ മത്സരത്തില് സെഞ്ച്വറി നേടിയ ശേഷം ബാറ്റിങ്ങില് പിന്നീട് പരാജയമായിരുന്നു താരം. ടോപ് ഓര്ഡറില് ഇറങ്ങാറുളള കിഷന് അവസരത്തിനൊത്ത് ഉയരാത്തത് ഹൈദരാബാദ് ടീമിന്റെ മൊത്തത്തിലുളള പ്രകടനത്തെയും ബാധിച്ചിരുന്നു.