രാജസ്ഥാൻ റോയൽസിൽ (ആർആർ) നിന്ന് സഞ്ജു സാംസണെ വാങ്ങാൻ ചെന്നൈ സൂപ്പർ കിംഗ്സ് (സിഎസ്കെ) താൽപ്പര്യം കാണിക്കുന്നുണ്ടെന്ന റിപ്പോർട്ടുകൾ അടുത്തിടെ പുറത്തവന്നിരുന്നു. സഞ്ജു സാംസണെ സ്വാഗതം ചെയ്യാൻ ഫ്രാഞ്ചൈസി തയ്യാറാണെന്ന് ചെന്നൈ സൂപ്പർ കിംഗ്സ് പ്രതികരിച്ചതോടെ ഇതേ ചുറ്റിപ്പറ്റിയുള്ള ചർച്ചകൾ മറ്റൊരു തലത്തിലേക്ക് നീങ്ങി. എന്നാലിപ്പോൾ സഞ്ജുവിനായി സിഎസ്കെ മാത്രമല്ല രംഗത്തുള്ളത് എന്ന റിപ്പോർട്ടുകളാണ് പുറത്തുവരുന്നത്.
സഞ്ജുവിനെ ടീമിലെത്തിക്കാന് മുംബൈ ഇന്ത്യന്സും കൊല്ക്കത്ത നൈറ്റ് റൈഡേഴ്സും രംഗത്തുണ്ടെന്നാണ് പുറത്ത് വരുന്ന വിവരം. എന്നാൽ ഇത് സംബന്ധിച്ച ഔദ്യോഗിക സ്ഥിരീകരണമൊന്നും ഇതുവരെ ഉണ്ടായിട്ടില്ല. സഞ്ജുവിനെ സംബന്ധിച്ച് കെകെആറുമായി ഒരു പൂര്വ്വകാല ബന്ധം കൂടിയുണ്ട്. 2012ല് കൊല്ക്കത്തയിലൂടെയാണ് അദ്ദേഹം ഐപിഎല്ലിലേക്കു ചുവട് വയ്ക്കുന്നത്. ഒരു മല്സരം പോലും കളിക്കാന് ഭാഗ്യമുണ്ടായില്ലെങ്കിലും ഗൗതം ഗംഭീറിനു കീഴില് കെകെആര് ചാംപ്യന്മാരായപ്പോള് വിജയികളുടെ ആ സംഘത്തില് സഞ്ജുവുമുണ്ടായിരുന്നു.
ഐപിഎല്ലില് താരങ്ങളെ ട്രേഡിംഗിലൂടെ സ്വന്തമാക്കുന്നതിനുള്ള വിന്ഡോ നിലവില് ഓപ്പണാണ്. എന്നിരുന്നാലും, ആർആർ ക്യാപ്റ്റന്റെ സാധ്യതയുള്ള കൈമാറ്റം സംബന്ധിച്ച് ഇതുവരെ ഒരു ടീമും റോയൽസ് മാനേജ്മെന്റുമായി ഔപചാരിക ചർച്ചകൾ ആരംഭിച്ചിട്ടില്ല.
ഡൽഹി ക്യാപിറ്റൽസിൽ (ഡിസി) രണ്ടുവർഷത്തെ സേവനത്തിനു ശേഷം 2018 ൽ വീണ്ടും ഫ്രാഞ്ചൈസിയിൽ ചേർന്നതിനുശേഷം സഞ്ജു സാംസൺ രാജസ്ഥാൻ റോയൽസിന്റെ ഭാഗമാണ്. 2025 ലെ മെഗാ ലേലത്തിന് മുന്നോടിയായി, രാജസ്ഥാൻ അദ്ദേഹത്തെ 18 കോടി രൂപയ്ക്ക് നിലനിർത്തി. സാംസണിന്റെ ഐപിഎൽ 2025 സീസൺ പരിക്കുകൾ മൂലം തകർന്നിരുന്നു.