ക്രിക്കറ്റ് താരങ്ങള് പരിശീലനത്തിനിടെ ഫുട്ബോള് കളിക്കുന്നത് കണ്ടിട്ടുണ്ടാകും. പക്ഷേ ഫുട്ബോള് താരങ്ങള് പരിശീലനത്തിനിടെ ക്രിക്കറ്റ് കളിക്കുന്നത് അത്ര പരിചിതമല്ല. എന്നാലിപ്പോള് ടോട്ടന് ഹാം താരങ്ങളുടെ ക്രിക്കറ്റ് കളി സോഷ്യല് മീഡിയയില് വൈറലാവുകയാണ്.
ഇംഗ്ലീഷ് പ്രീമിയര് ലീഗില് ഒന്നാമന്മാരായി തുടരുന്ന ടോട്ടന്ഹാം ഹോട്സ്പര് ടീമംഗങ്ങള് ഏതാനും ദിവസങ്ങളായി ക്രിക്കറ്റിന് പിറകെയാണ്. ഡ്രസിംഗ് റൂമില് താരങ്ങള് ക്രിക്കറ്റ് കളിക്കുന്നതിനിടിയിലുള്ള ഡെലെ അലിയുടെ ക്യാച്ചിംഗ് വീഡിയോ വൈറലായതിന് പിന്നാലെ പുതിയ വീഡിയോയും ടോട്ടന്ഹാം ഹോട്സ്പര് സോഷ്യല് മീഡിയയില് പങ്കുവെച്ചിരുന്നു.
ജിമ്മിലായിരുന്നു കളി. സൂപ്പര് താരങ്ങളായ ഹാരി കെയ്ന്, ഗാരെത് ബെയ്ല്, ജോ ഹാര്ട്ട്, എറിക് ഡയര് തുടങ്ങിയവര് ക്രിക്കറ്റ് കളിക്കാനുണ്ടായിരുന്നു. മത്സരത്തില് ഹാരി കെയ്നിന്റെ ബാറ്റിംഗാണ് ഏറെ ശ്രദ്ധിക്കപ്പെട്ടത്. തന്റെ ബാറ്റിംഗ് വീഡിയോ പങ്കുവെച്ച് ഹാരി കെയ്ന് വിരാട് കോഹ്ലിയോട് ട്വിറ്ററില് പറഞ്ഞത് ശ്രദ്ധ നേടിയിരിക്കുകയാണ്.
“ഞാനൊരു മാച്ച് വിന്നിംഗ് ടി 20 പ്രകടനം കാഴ്ചവെച്ചിരിക്കുന്നു. അടുത്ത ഐ.പി.എല്ലില് ആര്.സി.ബിക്കായി കളിപ്പിക്കാമോ?” എന്നാണ് ഹാരി വീഡിയോ പങ്കുവെച്ച് കുറിച്ചത്. കൗണ്ടര് അറ്റാക്കിംഗ് ബാറ്റ്സ്മാനായി പരിഗണിക്കാം എന്നാണ് കെയ്നിന് കോഹ്ലി നല്കിയ മറുപടി. കോഹ്ലിയും ഹാരി കെയ്നും അടുത്ത സുഹൃത്തുക്കളാണ്. പ്രീമിയര് ലീഗില് ഒമ്പത് മത്സരങ്ങളില് നിന്നായി 20 പോയിന്റോടെ ടോട്ടന് ഹാം ഒന്നാം സ്ഥാനത്തുണ്ട്.