ഐപിഎലിലെ നിലവിലെ ചാമ്പ്യന്മാരായ കൊല്ക്കത്ത നൈറ്റ് റൈഡേഴ്സ് ഈ സീസണിലും ശ്രദ്ധേയ പ്രകടനം നടത്തിയാണ് മുന്നേറുന്നത്. ഇതുവരെ കളിച്ച നാല് മത്സരങ്ങളില് രണ്ട് ജയവും രണ്ട് തോല്വിയുമാണ് കെകെആറിനുണ്ടായത്. നിര്ണായക സമയങ്ങളില് പ്രധാന ബാറ്റര്മാരെല്ലാം ടീമിനായി കാര്യമായ സംഭാവനകള് നല്കുന്നുണ്ട്. അജിന്ക്യ രഹാനെയുടെ കീഴില് ഇറങ്ങുന്ന ടീമില് അങ്കറീഷ് രഘുവംശി, വെങ്കടേഷ് അയ്യര്, റിങ്കു സിങ്, റസല് എന്നിവരെല്ലാം എല്ലാവരും ഉറ്റുനോക്കുന്ന താരങ്ങളാണ്. കഴിഞ്ഞ ലേലത്തില് 23.75 കോടിക്കാണ് സ്റ്റാര് ബാറ്റര് വെങ്കിടേഷ് അയ്യരെ കൊല്ക്കത്ത നിലനിര്ത്തിയത്. കൂടാതെ വൈസ് ക്യാപ്റ്റനായും യുവതാരത്തെ ടീം മാനേജ്മെന്റ് നിയമിച്ചു.
ഈ സീസണിലും അവസരത്തിനൊത്ത് ഉയരുന്ന പ്രകടനമാണ് അയ്യരില് നിന്നുണ്ടാകുന്നത്. ഹൈദരാബാദിനെതിരെ കഴിഞ്ഞ ദിവസം 29 ബോളില് 60 റണ്സ് നേടി ടീം ടോട്ടലിലേക്ക് കാര്യമായ സംഭാവന നല്കാന് വെങ്കിടേഷിന് സാധിച്ചു. മത്സരശേഷം നടന്ന പ്രസ് കോണ്ഫറന്സില് ഈ ഇന്നിങ്സ് 20 കോടി പ്രൈസ് ടാഗ് സമ്മര്ദം കുറയ്ക്കാന് സഹായിച്ചോ എന്ന ചോദ്യത്തിന് താരം നല്കിയ മറുപടി ശ്രദ്ധേയമായിരുന്നു. ചോദ്യത്തിന് ഒരു ചിരിയോടെ “ടീമിന്റെ വിജയത്തിനായി സംഭാവന നല്കാന് ആഗ്രഹിക്കുന്നതിനാല് പണം ടീമിലെ തന്റെ പങ്കിനെ നിര്വചിക്കുന്നില്ലെന്ന്” താരം പറഞ്ഞു.
“ഐപിഎല് തുടങ്ങിക്കഴിഞ്ഞാല് നിങ്ങളുടെ വില 20 ലക്ഷമോ 20 കോടിയോ ആകട്ടെ അത് പ്രശ്നമല്ല, അങ്ക്റീഷ് രഘുവംശി എന്നൊരു ചെറുപ്പക്കാരന് ഞങ്ങളുടെ ടീമില് കളിക്കുന്നുണ്ട്. ടീമില് നിങ്ങളുടെ റോള് എന്താണെന്ന് പണം നിര്വചിക്കുന്നില്ല. എന്നിലുളള ഉയര്ന്ന പ്രതീക്ഷകളും വിലയും കാരണം ഈ ചോദ്യം പലപ്പോഴും വരുന്നുണ്ടെന്ന് എനിക്കറിയാം. ടീമിന്റെ വിജയത്തിനായി സംഭാവന നല്കാന് ആഗ്രഹിക്കുന്ന കളിക്കാരനാണ് ഞാന്. കൂടൂതല് ശമ്പളം വാങ്ങിക്കുന്ന കളിക്കാരനായതുകൊണ്ട് അവന് എപ്പോഴും കൂടുതല് റണ്സ് നേടണമെന്നില്ല. ടീമിനായി ഇംപാക്ടുളള ഇന്നിങ്സ് കാഴ്ചവയ്ക്കുകയാണ് തന്റെ ലക്ഷ്യമെന്നും” വെങ്കിടേഷ് അയ്യര് കൂട്ടിച്ചേര്ത്തു.