ഇന്ത്യന് ക്രിക്കറ്റിന്റെ സമീപകാലത്തെ കിരീട വരള്ച്ചയെ എടുത്തുകാട്ടി വിരാട് കോഹ്ലിയെയും ടീമിനെയും വിമര്ശിച്ച് പാക് മുന് നായകന് റാഷിദ് ലത്തീഫ്. റെക്കോഡുകള് സൃഷ്ടിക്കുന്നതിലും മറികടക്കുന്നതിലുമല്ല ഐസിസി കിരീടങ്ങള് നേടുന്നതിലാണ് കാര്യമെന്ന് ലത്തീഫ് പറഞ്ഞു.
കോഹ്ലി 100 സെഞ്ച്വറി നേടിയോ 200 സെഞ്ച്വറി നേടിയോ എന്നതിലല്ല കാര്യം. സെഞ്ച്വറികളുടെ എണ്ണം നോക്കാനുള്ള സമയമല്ലിത്. അതിലല്ല കാര്യം. ഇന്ത്യക്കിപ്പോള് ആവശ്യം കപ്പാണ്. ഇന്ത്യ ഐസിസി ട്രോഫി നേടിയിട്ട് വര്ഷങ്ങളായിരിക്കുകയാണ്. ഇന്ത്യന് ടീമും ആരാധകരും ആവശ്യപ്പെടുന്നത് കിരീടമാണ്.
ഏഷ്യാ കപ്പ്, ചാമ്പ്യന്സ് ട്രോഫി, 2019 ലോകകപ്പ്, അവസാന രണ്ട് ടി20 ലോകകപ്പ് എന്നിവയിലൊന്നും ഇന്ത്യക്ക് കപ്പ് നേടാനായില്ല. 100 സെഞ്ച്വറിയെന്നത് കോഹ്ലിയെ മാത്രം ബാധിക്കുന്ന കാര്യമാണ്. എന്നാല് ഇന്ത്യന് ടീമും ക്രിക്കറ്റ് ബോര്ഡും ആവശ്യപ്പെടുന്നത് കിരീടമാണ്
സാമ്പത്തികമായി നോക്കുമ്പോള് ഇന്ത്യന് ടീം വളരെ മുന്നിലാണ്. എന്നാലിപ്പോള് മാധ്യമങ്ങളും ആരാധകരും കപ്പിനായി ടീമിനെ സമ്മര്ദ്ദത്തിലാക്കുകയാണ്- റാഷിദ് ലത്തീഫ് പറഞ്ഞു.