ഓസ്‌ട്രേലിയക്കെതിരെ മൂന്നാം ഏകദിനം നടക്കുന്നത് ധോണിയുടെ ജന്മനാടായ റാഞ്ചിയിലെ ജാര്‍ഖണ്ഡ് ക്രിക്കറ്റ് അസോസിയേഷന്‍ സ്റ്റേഡിയത്തിലാണ്. എന്നാല്‍ മൈതാനത്ത് പുതുതായി സ്ഥാപിച്ച നോര്‍ത്ത് ബ്ലോക്ക് പവലിയന് ഉദ്ഘാടനം ചെയ്യാന്‍ വിസമ്മതിച്ചിരിക്കുകയാണ് എം.എസ് ധോണി.
എന്നാല്‍ ഇതുകേട്ട്് മുഖം ചുളിക്കാന്‍ വരട്ടെ. ധോണിയുടെ തന്നെ പേരിലാണ് ഈ പവലിയന്. സ്വന്തം പേരിലെ പവലിയന് ഉദ്ഘാടനം ചെയ്യുന്നത് എങ്ങനെയെന്നാണ് ഇതിനായി സമീപിച്ച ജാര്‍ഖണ്ഡ് ക്രിക്കറ്റ് അസോസിയേഷനോട് ധോണി ചോദിച്ചതത്രെ
ജാര്‍ഖണ്ഡ് ക്രിക്കറ്റ് അസോസിയേഷന്‍ സെക്രട്ടറി ദേബാശിസ് ചക്രബര്‍ത്തിയാണ് ഇക്കാര്യം വെളിപ്പെടുത്തിയത്. “വീട് സ്വയം ഉദ്ഘാടനം ചെയ്യുന്നതില്‍ എന്താണ് അര്‍ത്ഥം” എന്നായിരുന്നു ധോണിയുടെ കമന്റ്.
കഴിഞ്ഞ വര്‍ഷമാണ് സ്റ്റേഡിയത്തിലെ പവലിയന് ധോണിയുടെ പേര് നല്‍കാന്‍ ജാര്‍ഖണ്ഡ് ക്രിക്കറ്റ് അസോസിയേഷന്‍ തീരുമാനിച്ചത്.
നാളെയാണ് മൂന്നാം ഏകദിനം. നാളെകൂടി ജയിച്ചാല്‍ ഇന്ത്യക്ക് പരമ്പര സ്വന്തമാക്കാം. ധോണിയെ സംബന്ധിച്ചിടത്തോളം ഒരുപക്ഷേ ഹോം വേദിയിലെ അവസാന അന്താരാഷ്ട്ര മത്സരമായേക്കും. ലോകകപ്പോടെ ധോണി വിരമിക്കുമെന്നാണ് സൂചന.