ഇന്ത്യൻ ക്രിക്കറ്റിന് എന്തായാലും ഇപ്പോൾ നല്ല സമയമാണ്. ഈ വർഷം നടന്ന ചാമ്പ്യൻസ് ട്രോഫി വിജയം സ്വന്തമാക്കിയ ഇന്ത്യ കഴിഞ്ഞ വർഷം നടന്ന ടി 20 ലോകകപ്പും സ്വന്തമാക്കിയിരുന്നു. വൈറ്റ് ബോൾ ക്രിക്കറ്റിലെ ഏറ്റവും മികച്ച ഡെപ്തും ബാക്കപ്പും ഉള്ള ടീമായി ഇന്ത്യയെ വിശേഷിപ്പിച്ച ദിനേശ് കാർത്തിക്ക് ഇന്ത്യക്ക് മൂന്ന് ഫോര്മാറ്റുകളിലും വ്യത്യസ്ത ടീമുകളെ ഇറക്കാൻ കഴിയുമെന്ന് പറയുകയും ചെയ്തിരിക്കുകയാണ്. കാർത്തിക്കിന്റെ അഭിപ്രായത്തിന് പിന്നാലെ ഇന്ന് ക്രിക്കറ്റ് ലോകത്തെ ഏറ്റവും മികച്ച ടീമുകളായ ഓസ്ട്രേലിയ, ഇംഗ്ലണ്ട്, സൗത്താഫ്രിക്ക എന്നിവർക്ക് എതിരെ ഒരേ ദിവസം മത്സരത്തിന് മൂന്ന് ടീമുകളെ ഇന്ത്യക്ക് കളത്തിൽ ഇറക്കാൻ പറ്റുമെന്ന് ഓസ്ട്രേലിയൻ താരം മിച്ചൽ സ്റ്റാർക്ക് പറഞ്ഞു.
“ഇന്ത്യൻ ക്രിക്കറ്റിൽ ഐപിഎൽ ആഴത്തിൽ ഉൾച്ചേർന്നിരിക്കുന്നതിനാൽ, അന്താരാഷ്ട്ര ക്രിക്കറ്റിൽ ഒരേസമയം രണ്ടോ മൂന്നോ ടീമുകളെ കളത്തിലിറക്കാനും ഉയർന്ന മത്സരക്ഷമത നിലനിർത്താനും ഇന്ത്യക്ക് ഇന്ന് പറ്റും,” ആർസിബി ഇന്നൊവേഷൻ ലാബ് ഇന്ത്യൻ സ്പോർട്സ് ഉച്ചകോടിയിൽ കാർത്തിക് അഭിപ്രായപ്പെട്ടു.
“നിലവിൽ, വൈവിധ്യമാർന്ന കഴിവുകൾ വാഗ്ദാനം ചെയ്യുന്ന ക്രിക്കറ്റ് കളിക്കാരുടെ ഒരു കൂട്ടം ഉള്ളതിനാൽ ഇന്ത്യ ഭാഗ്യകരമായ ഒരു രാജ്യമാണ്,” അദ്ദേഹം പറഞ്ഞു അവസാനിപ്പിച്ചു.
പിന്നാലെ 2025 ലെ ചാമ്പ്യൻസ് ട്രോഫി വിജയത്തിനുശേഷം, മിച്ചൽ സ്റ്റാർക്ക് ഇന്ത്യയെ പ്രശംസിച്ചു. ഒരേ ദിവസം വ്യത്യസ്ത ഫോർമാറ്റുകൾക്കായി മൂന്ന് മത്സര ടീമുകളെ കളത്തിലിറക്കാൻ കഴിയുന്ന ഒരേയൊരു രാജ്യം ഇന്ത്യയായിരിക്കാമെന്ന് അദ്ദേഹം ചൂണ്ടിക്കാട്ടി.
‘ഫനാറ്റിക്സ് ടിവി’ എന്ന യൂട്യൂബ് ചാനലിൽ പങ്കെടുത്തപ്പോൾ സ്റ്റാർക്ക് ഇങ്ങനെ പറഞ്ഞു: “ടെസ്റ്റ് ടീം, ഏകദിന ടീം, ടി20 ടീം എന്നിവയെല്ലാം ഒരേ ദിവസം കളിക്കാൻ പ്രാപ്തിയുള്ള ഒരേയൊരു രാജ്യം ഇന്ത്യയായിരിക്കാം, ടെസ്റ്റ് ടീം ഓസ്ട്രേലിയയെ നേരിടുന്നു, ഏകദിന ടീം ഇംഗ്ലണ്ടിനെതിരെ കളിക്കുന്നു, ടി20 ടീം ദക്ഷിണാഫ്രിക്കയുമായി മത്സരിക്കുന്നു എന്നിട്ടും മത്സരക്ഷമത നിലനിർത്തുന്നു. ഇതൊന്നും വേറെ ഒരു രാജ്യത്തിനും സ്വപ്നം പോലും കാണാൻ സാധിക്കില്ല” അദ്ദേഹം പറഞ്ഞു.
അതേസമയം ഇനി ക്രിക്കറ്റ് ലോകം കൂടുതലായി ശ്രദ്ധിക്കുന്ന ഇന്ത്യൻ പ്രീമിയർ ലീഗിന്റെ പുതിയ സീസൺ മാർച്ച് 22 ന് ആരംഭിക്കും.