ഐപിഎല്‍ ചാമ്പ്യന്മാരായ ഗുജറാത്ത് ടൈറ്റന്‍സ് ഇന്നലെ വൈകുന്നേരം പങ്കുവച്ച ട്വീറ്റ് ആരാധകരെ ഏറെ ആശയക്കുഴപ്പത്തിലാക്കിയിരുന്നു. താരം ഫ്രാഞ്ചൈസി വിടുന്നുവെന്ന സൂചനയാണ് ട്വീറ്റ് തന്നിരുന്നത്. ടൈറ്റന്‍സ് തങ്ങളുടെ ഔദ്യോഗിക ട്വിറ്റര്‍ അക്കൗണ്ട് വഴി പുറത്തുവിട്ട ട്വീറ്റാണ് ആശയക്കുഴപ്പമുണ്ടാക്കുന്നത്.
‘എന്നും ഓര്‍മിക്കാനുള്ള ഒരു യാത്രയായിരുന്നു ഇത്. നിങ്ങളുടെ അടുത്ത ഉദ്യമത്തിന് എല്ലാ ആശംസകളും നേരുന്നു.’ എന്നാണ് ടൈറ്റന്‍സ് ട്വിറ്ററില്‍ ശുഭ്മാന്‍ ഗില്ലിനെ ടാഗ് ചെയ്ത് കുറിച്ചിരിക്കുന്നത്. താരം ടീം വിട്ടു എന്നു സൂചന നല്‍കുന്ന ഒരു വിവരണം. ഇതോടെ ആരാധകരും ഞെട്ടലിലായി. ഈ ഞെട്ടിയ ആരാധകര്‍ തന്നെ ഇപ്പോള്‍ ടീമിനെതിരെ തിരിഞ്ഞിരിക്കുകയാണ്. അതിന് കാരണം, ഇതിന് പിന്നാലെ വന്ന മറ്റൊരു ട്വീറ്റാണ്.
‘ഗില്‍ എപ്പോഴും ഞങ്ങളുടെ ഭാഗമായിരിക്കും. നിങ്ങള്‍ ചിന്തിക്കുന്ന അര്‍ത്ഥമല്ല ട്വീറ്റിനുള്ളത്. എന്നാല്‍ നിങ്ങളുടെ തിയറി ഞങ്ങള്‍ക്ക് ഏറെ ബോധിച്ചു. അതങ്ങനെ മുന്നോട്ട് പോവട്ടെ’ എന്നായിരുന്നു ആ ട്വീറ്റ്. ചുരുക്കി പറഞ്ഞാല്‍ ആരാധകരെ ഒന്ന് എരുവുകേറ്റാനുള്ള പ്രാങ്കായിരുന്നു ടൈറ്റന്‍സ് നടത്തിയത്.
ടൈറ്റന്‍സിന്റെ ഈ പ്രവൃത്തിക്കെതിരെ ആരാധകരോഷം ഇരമ്പുകയാണ്. ആരാധകരെന്താ വെറും കോമാളികളാണോ എന്നും അല്‍പ്പം മാന്യതയോടെയും പക്വതയോടെയും കാര്യങ്ങളെ സമീപിക്കു എന്നുമാണ് വിമര്‍ശനം.
ശുഭ്മാന്‍ ഗില്ലിനെ തങ്ങളുടെ കന്നി സീസണില്‍ 7 കോടി രൂപയ്ക്കാണ് ടൈറ്റന്‍സ് ടീമിലെത്തിച്ചത്. കെകെആറില്‍ നിന്നായിരുന്നു താരം ഗുജറാത്തിലെത്തിയത്. സീസണില്‍ ടീമിനായി മികച്ച പ്രകടനമാണ് കാഴ്ചവെച്ചത്. 16 മത്സരങ്ങളില്‍ താരം 483 റണ്‍സ് നേടിയിരുന്നു. നാല് അര്‍ദ്ധ സെഞ്ച്വറിയും താരം ഗുജറാത്തിനായി നേടി. 96 റണ്‍സാണ് താരത്തിന്റെ ഉയര്‍ന്ന സ്‌കോര്‍.