ഗുജറാത്ത് ടൈറ്റന്‍സ് ടീമില്‍ തനിക്ക് അവസരം നിഷേധിച്ചതായി ഇന്ത്യന്‍ മുന്‍ ഓള്‍റൗണ്ടര്‍ യുവരാജ് സിംഗ്. ഐപിഎല്‍ ടീമിന്റെ ഉപദേശകനാകാന്‍ താന്‍ ആഗ്രഹിക്കുന്നുവെന്ന് സൂചിപ്പിക്കുന്നതിനിടയില്‍, ഗുജറാത്ത് ടൈറ്റന്‍സ് ഹെഡ് കോച്ച് ആശിഷ് നെഹ്റയോട് ടീമില്‍ ജോലി ചോദിക്കാന്‍ ശ്രമിച്ചെങ്കിലും അദ്ദേഹം അത് നിരസിച്ചതായി യുവരാജ് വെളിപ്പെടുത്തി.
യുവതാരങ്ങളുടെ കൂടെ പ്രവര്‍ത്തിക്കാന്‍ ഞാന്‍ ഇഷ്ടപ്പെടുന്നു. പ്രത്യേകിച്ചും എന്റെ സംസ്ഥാനത്തെ താരങ്ങളോടൊപ്പം. മെന്ററിംഗ് എനിക്കു ചെയ്യാന്‍ താല്‍പര്യമുള്ള കാര്യമാണ്. ഐപിഎല്‍ ടീമുകളുടെ കൂടെ പ്രവര്‍ത്തിക്കാന്‍ ഞാന്‍ ശ്രമിക്കുന്നുണ്ട്.
ആശിഷ് നെഹ്‌റയോടു ഞാന്‍ ജോലിയുടെ കാര്യം സംസാരിച്ചിരുന്നു. എന്നാല്‍ അദ്ദേഹം അതു തള്ളിക്കളയുകയാണു ചെയ്തത്. വരും വര്‍ഷങ്ങളില്‍ ക്രിക്കറ്റിലേക്ക് ഒരു തിരിച്ചുവരവ് സാധ്യമാകുമെന്നാണ് പ്രതീക്ഷ- യുവരാജ് പറഞ്ഞു.
നേരത്തെ ഐപിഎല്ലില്‍ യുവരാജ് തന്നെ താരമായിരുന്നു. പഞ്ചാബ് കിംഗ്‌സ് (കിംഗ്‌സ് ഇലവന്‍ പഞ്ചാബ്), റോയല്‍ ചലഞ്ചേഴ്‌സ് ബാംഗ്ലൂര്‍, മുംബൈ ഇന്ത്യന്‍സ് തുടങ്ങിയ ഫ്രാഞ്ചൈസികള്‍ക്കായി അദ്ദേഹം കളിച്ചു. 132 ഐപിഎല്‍ മത്സരങ്ങളില്‍ പങ്കെടുത്ത യുവരാജ് 2750 റണ്‍സ് നേടി.