അന്താരാഷ്ട്ര ക്രിക്കറ്റില്നിന്ന് താന് വിരമിക്കാന് തീരുമാനിച്ച കൃത്യമായ നിമിഷത്തെക്കുറിച്ച് വെളിപ്പെടുത്തി ഇതിഹാസ ഓസ്ട്രേലിയന് വിക്കറ്റ് കീപ്പര് ബാറ്റര് ആദം ഗില്ക്രിസ്റ്റ്. 2008-ല് ഇന്ത്യയ്ക്കെതിരായ അഡ്ലെയ്ഡ് ടെസ്റ്റിന്റെ മധ്യത്തില് വിരമിക്കല് പ്രഖ്യാപിച്ച് ഗില്ക്രിസ്റ്റ് ലോകത്തെ ഞെട്ടിച്ചു. ടെസ്റ്റ് ക്രിക്കറ്റ് ചരിത്രത്തില് 100 ടെസ്റ്റുകള് കളിക്കുന്ന രണ്ടാമത്തെ മാത്രം വിക്കറ്റ് കീപ്പറെന്ന ചരിത്രനേട്ടത്തിന് നാലു ടെസ്റ്റുകള് മാത്രം ബാക്കിയിരിക്കെ താരത്തിന്റെ അപ്രതീക്ഷിത വിരമിക്കല് പ്രഖ്യാപനം.
ഇന്ത്യന് ബാറ്റര് വിവിഎസ് ലക്ഷ്മണിന്റെ ഒരു അനായാസ ക്യാച്ച് കൈവിട്ട നിമിഷം താന് വിരമിക്കാന് തീരുമാനിച്ചെന്ന് ഗില്ക്രിസ്റ്റ് പറഞ്ഞു. ഈ തീരുമാനം ആ സമയം ഫീല്ഡില് തന്റെ അടുത്തുനിന്നിരുന്ന മാത്യു ഹെയ്ഡനോട് പറഞ്ഞുവെന്നും താരം വെളിപ്പെടുത്തി.
2008ല് ഇന്ത്യക്കെതിരായ അഡ്ലെയ്ഡ് ടെസ്റ്റില് കളിക്കുകയായിരുന്നു ഞാന്. അതെന്റെ 96-ാം ടെസ്റ്റായിരുന്നു. അതിനുശേഷം വെസ്റ്റ് ഇന്ഡീസിലേക്ക് പോകാനുള്ള ഓസ്ട്രേലിയന് ടീമിനൊപ്പമുള്ള യാത്രക്കുള്ള പ്ലാനിംഗിലായിരുന്നു ഞാന്. തലേന്ന് രാത്രി ഭാര്യയുമായി ഫോണില് വെസ്റ്റ് ഇന്ഡീസില് സന്ദര്ശിക്കേണ്ട സ്ഥലങ്ങളെക്കുറിച്ചുള്ള ചര്ച്ചകളില് മുഴുകി.
പിറ്റേന്ന് കളിക്കാനിറങ്ങിയപ്പോള് ബ്രെറ്റ് ലീയുടെ പന്തില് വിവിഎസ് ലക്ഷ്മണ് നല്കിയ അനായസ ക്യാച്ച് ഞാന് നിലത്തിട്ടു. സ്റ്റേഡിയത്തിലെ വലിയ സ്ക്രീനില് ക്യാച്ച് കൈവിടുന്നത് ഞാന് കുറേതവണ നോക്കി നിന്നു. ആ നിമിഷം ഞാന് തീരുമാനിച്ചു. എന്റെ സമയമായെന്ന്. അപ്പോള് തന്നെ രണ്ടാമതൊന്ന് ആലോചിക്കാതെ എന്റെ അടുത്ത് നില്ക്കുകയായിരുന്ന മാത്യു ഹെയ്ഡനോട് ഞാന് പറഞ്ഞു, എന്റെ കാലം കഴിഞ്ഞുവെന്ന്.
വിരമിക്കാനുള്ള സമയമായെന്ന തിരിച്ചറിവായിരുന്നു ആ ക്യാച്ച് കൈവിട്ട സംഭവം. എന്നാല് ഹെയ്ഡന് എന്നോട് പറഞ്ഞത്, വിട്ടുകളയൂ, നിങ്ങളാദ്യമായി കൈവിടുന്ന ക്യാച്ചോ അവസാനമായി കൈവിടുന്ന ക്യാച്ചോ അല്ലല്ലോ ഇത്. അതൊന്നും കാര്യമാക്കേണ്ടെന്ന് ഹെയ്ഡന് പറഞ്ഞെങ്കിലും ആ നിമിഷം ഞാന് അത് തീരുമാനിച്ചിരുന്നു- ഗില്ക്രിസ്റ്റ് പറഞ്ഞു.