ഐപിഎല്‍ പ്ലേഓഫ് സ്വപ്‌നം കണ്ട് ഒരുങ്ങുന്ന ആര്‍സിബിക്ക് ചില പ്രധാന താരങ്ങളുടെ പരിക്ക് വലിയ തിരിച്ചടിയായിട്ടുണ്ട്. ക്യാപ്റ്റന്‍ രജത് പാട്ടിധാര്‍ ഉള്‍പ്പെടെയുളളവര്‍ നിലവില്‍ പരിക്കിന്റെ പിടിയിലാണ്. പോയിന്റ് പട്ടികയില്‍ രണ്ടാം സ്ഥാനത്തുളള അവര്‍ക്ക് ഇനിയുളള മത്സരങ്ങളെല്ലാം നിര്‍ണായകമാണ്. അതേസമയം ടീമില്‍ നിന്ന് ഒഴിവാക്കിയ ഇംഗ്ലീഷ് ഓള്‍റൗണ്ടര്‍ ലിയാം ലിവിങ്‌സ്റ്റണെ ആര്‍സിബിക്ക് വീണ്ടും ഉള്‍പ്പെടുത്തേണ്ട സാഹചര്യം വന്നിരിക്കുകയാണെന്ന് പറയുകയാണ് മുന്‍ ഇന്ത്യന്‍താരം ആകാശ് ചോപ്ര.
മേയ് 17ന് കൊല്‍ക്കത്ത നൈറ്റ് റൈഡേഴ്‌സിനെതിരെയാണ് ആര്‍സിബിയുടെ അടുത്ത മത്സരം. സ്റ്റാര്‍ പേസര്‍ ജോഷ് ഹേസല്‍വുഡ്, ജേക്കബ് ബെതല്‍, റൊമാരിയോ ഷെപ്പേര്‍ഡ്, ലുങ്കി എന്‍ഗിടി തുടങ്ങിയവര്‍ ഇനിയുളള മത്സരങ്ങളില്‍ ടീമിലുണ്ടാവില്ല. ഈ സാഹചര്യത്തില്‍ ലിവിങ്സ്റ്റണിനെയും നുവാന്‍ തുഷാരയേയും ഉള്‍പ്പെടുത്തിയാല്‍ മാത്രമേ അവരുടേത് ഒരു ബാലന്‍സ്ഡ് ലൈനപ്പ് ആവുകയുളളൂവെന്ന് ചോപ്ര പറയുന്നു.
ആര്‍സിബിക്ക് ആദ്യമേ ഹേസല്‍വുഡ് ഇല്ല, ജേക്കബ് ബെതല്‍, റൊമാരിയോ ഷെപ്പേര്‍ഡ്, ലുങ്കി എന്‍ഗിടി തുടങ്ങിയവരും ഇനി കളിക്കില്ല. പ്ലേഓഫില്‍ എത്തുന്നതിന് മുന്‍പ് നാല് കളിക്കാരെയാണ് അവര്‍ക്ക് നഷ്ടപ്പെട്ടത്. ഇനിയുളള നിര്‍ണായക മത്സരങ്ങളില്‍ ഇവരാരും കളിക്കില്ലായെന്നത് തിരിച്ചടിയാണ്. ജേക്കബ് ബെതല്‍ ഇല്ലെങ്കിലും ഫില്‍ സാള്‍ട്ട് ടീമിലുണ്ടെന്നത് അവര്‍ക്ക് ആശ്വാസമാണ്.
അവന്‍ ഇംഗ്ലണ്ടിന്റെ ടി20 ടീമിലുണ്ട്. എന്നാല്‍ സിരീസ് ആരംഭിക്കുക ജൂണ്‍ ആറിനാണ്. അതുകൊണ്ട് ആര്‍സിബി ഫൈനലില്‍ എത്തിയാലും സാള്‍ട്ട് ടീമിനൊപ്പമുണ്ടാവും. എന്നാല്‍ ഹേസല്‍വുഡ്, എന്‍ഗിടി. റൊമാരിയോ ഷെപ്പേര്‍ഡ് തുടങ്ങിയവര്‍ക്ക് കാര്യമായ പകരക്കാരില്ല. ഈ സാഹചര്യത്തില്‍ ലിവിങ്സ്റ്റണിനെയും തുഷാരയേയും അവര്‍ക്ക് കളിപ്പിക്കേണ്ടി വരും. അല്ലെങ്കില്‍ മറ്റാരെയെങ്കിലും പുതിയതായി ടീമില്‍ എത്തിക്കുക, ആകാശ് ചോപ്ര പറഞ്ഞുനിര്‍ത്തി.