ക്രിക്കറ്റ് ചരിത്രത്തിലെ എക്കാലത്തെയും മോശമായ ടീം എന്ന പേര് ലഭിക്കാനുള്ള ശ്രമത്തിലാണ് ഇപ്പോൾ പാകിസ്ഥാൻ താരങ്ങൾ. ഏകദിനമായാലും, ടി-20 ആയാലും ടെസ്റ്റ് ആയാലും ഏത് ചെറിയ ടീമിന് വേണമെങ്കിലും വന്ന് തോൽപ്പിച്ചിട്ട് പോകാം. അത്തരം പ്രകടനമാണ് താരങ്ങൾ കളിക്കളത്തിൽ വെച്ച് നടത്തുന്നത്. ഇപ്പോൾ നടക്കുന്ന ഇംഗ്ലണ്ട് പരമ്പരയിലെ ആദ്യ ടെസ്റ്റിൽ പാകിസ്ഥാൻ ടീം തകർന്നടിയുകയാണ്. സമൂഹ മാധ്യമങ്ങളിലൂടെ പാകിസ്ഥാൻ ടീമിന് നേരെ ട്രോൾ മഴയാണ്.
ആദ്യ ഇന്നിങ്സിൽ മൂന്ന് പാകിസ്ഥാൻ താരങ്ങൾ സെഞ്ച്വറി നേടി. എന്നാൽ ബോളിങ്ങിൽ അവരുടെ 6 താരങ്ങൾ അതേ പോലെ ആവർത്തിക്കും എന്ന ആരാധകർ പ്രതീക്ഷിച്ചില്ല. ഷഹീൻ ഷാ അഫ്രീദി (120), അബ്രാർ അഹമ്മദ് (174), നസീം ഷാ (157), ആമിർ ജമാൽ (126), സൽമാൻ അലി (118), സായേം അയൂബ് (101) എന്നിവർ ആണ് ബോൾ കൊണ്ട് സെഞ്ച്വറി നേടിയ താരങ്ങൾ.
ആദ്യ ഇന്നിങ്സിൽ പാകിസ്ഥാൻ 556 റൺസിന് ഓൾ ഔട്ട് ആയിരുന്നു. മറുപടി ബാറ്റിംഗിന് ഇറങ്ങിയ ഇംഗ്ലണ്ട് പാകിസ്ഥാൻ ബോളർമാരെ നിലംപരിശാക്കി. 823 റൺസ് ആണ് അവർ നേടിയത്. ഓപണർ സാക്ക് ക്രോളി 78 റൺസും, ജോ റൂട്ട് 262 റൺസും, ഹാരി ബ്രുക് 317 റൺസും നേടി തകർപ്പൻ പ്രകടനം കാഴ്ച വെച്ചു. അവസാന ഇന്നിങ്സിന് ഇറങ്ങിയ പാകിസ്ഥാൻ 278 റൺസ് പുറകിൽ എന്ന നിലയിലായിരുന്നു.
രണ്ടാം ഇന്നിങ്സിൽ പാകിസ്ഥാൻ 152/6 എന്ന നിലയിലാണ് ഇപ്പോൾ ഉള്ളത്. ആദ്യ ടെസ്റ്റിലെ അവസാന ദിവസമായ ഇന്ന് വിക്കറ്റുകൾ നഷ്ടമാകാതെ സമനിലയിൽ കളി അവസാനിപ്പിക്കാനാണ് ടീം ശ്രമിക്കുന്നത്. പാകിസ്താന് വേണ്ടി സൽമാൻ അലി 41 റൺസുമായും, ആമിർ ജമാൽ 27 റൺസുമായാണ് ഇപ്പോൾ ക്രീസിൽ ഉള്ളത്.
