ഐപിഎല് ടീം ചെന്നൈ സൂപ്പര് കിംഗ്സിനെ വയസന് പടയെന്നു വിളിച്ച് പലരും കളിയാക്കിയെന്നും എന്നാല് അതു തെറ്റാണെന്ന് തങ്ങള് തെളിയിച്ചെന്നും വെസ്റ്റിന്ഡീസ് ഓള് റൗണ്ടര് ഡ്വെയ്ന് ബ്രാവോ. ഐപിഎല്ലിന്റെ ഇക്കഴിഞ്ഞ സീസണില് ബ്രാവോ ഉള്പ്പെട്ട സൂപ്പര് കിംഗ്സ് ടീം കിരീടം ചൂടിയിരുന്നു.
ചെന്നൈയെ സംബന്ധിച്ച് സവിശേഷമായ സീസണായിരുന്നു ഇക്കഴിഞ്ഞത്. കാരണം കഴിഞ്ഞ തവണ നമ്മള് ഏഴാം സ്ഥാനത്തേക്കു പിന്തള്ളപ്പെട്ടിരുന്നു. ഐപിഎല് ചരിത്രത്തില് ആദ്യമായാണ് സൂപ്പര് കിംഗ്സ് പ്ലേ ഓഫ് യോഗ്യത നേടാതെ പോയത്. അതിനാല്ത്തന്നെ തിരിച്ചുവരാനുള്ള ദൃഢനിശ്ചയം കളിക്കാരിലുണ്ടായിരുന്നു. കഴിഞ്ഞ സീസണിലേതിനെക്കാള് മികച്ച ടീമാണ് നമ്മുടേതെന്ന് തെളിയിക്കേണ്ടിയിരുന്നു- ബ്രാവോ പറഞ്ഞു.
2021 ഐപിഎല്ലിലും ആരും ചെന്നൈക്ക് കിരീട സാധ്യത കല്പ്പിച്ചില്ല. വയസന് പടയെന്നാണ് നമ്മളെ വിളിച്ചത്. അതെല്ലാം തെറ്റാണെന്ന് തെളിയിച്ചു. ഒരിക്കല്ക്കൂടി സൂപ്പര് കിംഗ്സ് ചരിത്രം സൃഷ്ടിച്ചു. സൂപ്പര് കിംഗ്സിന്റെ മഹത്തായ പാരമ്പര്യത്തിന്റെ ഭാഗമാകാന് കഴിഞ്ഞതില് സന്തോഷമുണ്ടെന്നും ബ്രാവോ പറഞ്ഞു.