അമേരിക്കയിലെ പെന്റഗണ് സുരക്ഷാ മേഖലയില് കറങ്ങി നടന്ന കോഴിയെ പിടികൂടി. യുഎസ് ഡിപാര്ട്ട്മെന്റ് ഓഫ് ഡിഫന്സ് ആസ്ഥാനത്തിന് സമീപം അലഞ്ഞ് തിരിഞ്ഞ തവിട്ട് നിറമുള്ള കോഴിയെയാണ് പിടികൂടിയത്. ആര്ലിങ്ടണിലെ ആനിമല് വെല്ഫെയര് ഓര്ഗനൈസേഷനാണ് ഈ വിവരം സാമൂഹ്യ മാധ്യമങ്ങളിലൂടെ അറിയിച്ചത്.
ഓര്ഗനൈസേഷനിലെ ജീവനക്കാരാണ് കോഴിയെ പിടികൂടിയത്. അവര് കോഴിക്ക് ഹെന്നി പെന്നി എന്ന പേര് നല്കി. കോഴിയെ ജീവനക്കാരില് ഒരാളുടെ വെസ്റ്റേണ് വിര്ജീനിയയില് ഉള്ള ഫാമിലേക്ക് മാറ്റിയതായി അധികൃതര് അറിയിച്ചു.
കോഴിയെ കണ്ടെത്തിയ സ്ഥലം ഏതാണെന്ന് പറയാന് തങ്ങള്ക്ക് അനുവാദമില്ല. സുരക്ഷാ ചെക്ക് പോസ്റ്റില് ആയിരുന്നു എന്ന് മാത്രമേ പറയാന് കഴിയൂ എന്നും സംഘടനയുടെ വക്താവായ ചെല്സി ജോണ്സ് പറഞ്ഞു. കോഴി എങ്ങനെയാണ് സുരക്ഷാ മേഖലയില് പ്രവേശിച്ചതെന്നോ എവിടെ നിന്നാണ് വന്നതെന്നോ വ്യക്തമല്ല എന്നും അധികൃതര് കൂട്ടിച്ചേര്ത്തു. ഹെന്നിപെന്നിയെ ചാരപ്രവര്ത്തിക്കായി ആരെങ്കിലും അയച്ചതാണോ അല്ലെങ്കില് വഴിതെറ്റി എത്തിയതാണോ എന്ന് സംശയമുണ്ടെന്നും അധികൃതര് പറഞ്ഞു.