ഇറാൻ്റെ പുതിയ പരമോന്നത നേതാവ് മുജ്തബ ഖമനേയിയുടെ ആരോഗ്യത്തിന് യാതൊരു കുഴപ്പവുമില്ലെന്ന് ഇറാനിയൻ വിദേശകാര്യമന്ത്രി അബ്ബാസ് അരാഗ്ചി. ഇസ്രയേൽ ആക്രമണത്തിൽ പരിക്കേറ്റ് മുജ്തബ ഖമനേയിയുടെ നില മോശമായിരിക്കാം എന്ന് യുഎസ് പ്രതിരോധ സെക്രട്ടറി പീറ്റ് ഹെഗ്സെത്ത് പറഞ്ഞതിന് പിന്നാലെയാണ് അരാഗ്ചിയുടെ പ്രതികരണം.
യുദ്ധം തുടരുമെന്ന് പ്രതിജ്ഞയെടുത്തുകൊണ്ട് രേഖാമൂലമുള്ള പ്രസ്താവന ഇറാൻ പുറത്തിറക്കിയിരുന്നു. പുതിയ പരമോന്നത നേതാവിന്റെ അവസ്ഥ മോശമായിരിക്കാമെന്നും പുറത്തിറക്കിയ പ്രസ്താവനയിൽ അദ്ദേഹത്തിന്റെ ശബ്ദമോ വീഡിയോയോ ഉണ്ടായിരുന്നില്ലെന്നുമാണ് പീറ്റ് ഹെഗ്സെത്ത് പറഞ്ഞത്.
അതേസമയം മുജ്തബ ജീവിച്ചിരിപ്പുണ്ടോയെന്ന് ഉറപ്പില്ലെന്നാണ് യുഎസ് പ്രസിഡന്റ് ഡൊണാൾഡ് ട്രംപ് പറയുന്നത്. മുജ്തബയുടെ അവസ്ഥയെക്കുറിച്ച് എൻബിസി ന്യൂസിന് നൽകിയ അഭിമുഖത്തിൽ ട്രംപിനോട് ചോദിച്ചപ്പോഴായിരുന്നു ഇത്തരത്തിലുള്ള മറുപടി.