ഇസ്രായേല്-ഇറാന് സംഘര്ഷം നാലാം ദിനവും തുടരുന്നതിനിടെ ടെഹ്റാന്റെ വ്യോമപരിധി പൂര്ണമായും നിയന്ത്രണത്തിലാക്കിയെന്ന പ്രസ്താവനയ്ക്ക് പിന്നാലെ ജനങ്ങളോട് എത്രയുംവേഗം നഗരം വിടാന് ആവശ്യപ്പെട്ട് ബെഞ്ചമിന് നെതന്യാഹു. നേരത്തെ ടെഹ്റാന്റെ വ്യോമപരിധി പൂര്ണമായും നിയന്ത്രണത്തിലാക്കിയെന്ന് ഇസ്രായേല് പ്രതിരോധന സേന വ്യക്തമാക്കിയിരുന്നു.
ഞായറാഴ്ച രാത്രിയും തിങ്കളാഴ്ച പുലര്ച്ചെയുമായി നടന്ന ആക്രമണത്തില് ഇറാന്റെ ബാലിസ്റ്റിക് മിസൈല് ലോഞ്ചറുകളില് മൂന്നിലൊന്നും പ്രതിരോധസേന തകര്ത്തതായി ഇസ്രയേല് അവകാശപ്പെട്ടിരുന്നു. ഇതിന് പിന്നാലെയാണ് വൈകാതെ ടെഹ്റാനുമേല് ഇസ്രയേല് ആക്രമണം നടത്തുമെന്നും അതിനുമുമ്പ് ജനങ്ങള് അവിടെനിന്നും ഒഴിഞ്ഞുപോകണമെന്നും നെതന്യാഹു അറിയിച്ചിരിക്കുന്നത്.
ടെഹ്റാന് മുകളിലുള്ള ആകാശം ഇപ്പോള് പൂര്ണമായും ഇസ്രയേല് വ്യോമസേനയുടെ നിയന്ത്രണത്തിലാണ്. നഗരത്തിലെ പ്രധാനപ്പെട്ട ഭരണകേന്ദ്രങ്ങളെല്ലാം തങ്ങള് ഉടന് ആക്രമിക്കും. ഇറാനെ പോലെ സാധാരണ ജനങ്ങളെ കൊന്നൊടുക്കാന് തങ്ങള് ഇഷ്ടപ്പെടുന്നില്ല. അതിനാല്
ജനങ്ങള് ഉടന് അവിടെ നിന്ന് ഒഴിഞ്ഞുപോകാന് ആവശ്യപ്പെടുന്നതായി നെതന്യാഹു അറിയിച്ചു.