ബ്രിട്ടണിൽ നിർണായകമായ പൊതുതിരഞ്ഞെടുപ്പ് ഇന്ന്. 14 വര്ഷമായി ഭരണത്തിൽ തുടരുന്ന കണ്സര്വേറ്റീവ് പാര്ട്ടി കനത്ത പരാജയം നേരിടുമെന്നാണ് അഭിപ്രായ സർവേകൾ പറയുന്നത്. രണ്ടാം തവണ മത്സരത്തിനിറങ്ങുന്ന ഋഷി സുനകിന് ലേബര് പാര്ട്ടിയുടെ കെയ്ര് സ്റ്റാമർ കടുത്ത വെല്ലുവിളിയാണ് ഉയര്ത്തുന്നത്. ഇന്ത്യന് സമയം ഇന്ന് രാവിലെ 11 മണിമുതലാണ് ബ്രിട്ടണില് വോട്ടെടുപ്പ് ആരംഭിക്കുന്നത്.
ബ്രിട്ടന്റെ തകര്ന്ന സാമ്പത്തിക അവസ്ഥ, ആരോഗ്യമേഖല, കുടിയേറ്റം തുടങ്ങിയ വിഷയങ്ങളൊക്കെ തിരഞ്ഞെടുപ്പില് ചര്ച്ചയാകും. ലേബര് പാര്ട്ടിയുടെ മടങ്ങിവരവ് പ്രതീക്ഷിക്കുന്ന തിരഞ്ഞെടുപ്പില് കെയ്ര് സ്റ്റാര്മെര് ആണ് അവരുടെ പ്രധാനമന്ത്രി സ്ഥാനാര്ഥി. 650 അംഗ ഹൗസ് ഓഫ് കോമണ്സില് 400 സീറ്റിന് മുകളില് സീറ്റുകള് ലേബര് പാര്ട്ടി നേടുമെന്നാണ് റിപ്പോര്ട്ടുകള്.
മെയ് 22നാണ് ഋഷി സുനക് രാജ്യത്ത് അപ്രതീക്ഷിതമായി പൊതുതിരഞ്ഞെടപ്പ് പ്രഖ്യാപിച്ചത്. ഋഷി സുനക് സര്ക്കാരിന് 2025 ജനുവരി വരെ കാലാവധിയുണ്ടെന്നിരിക്കെ എട്ടു മാസം മുമ്പേയാണ് തിരഞ്ഞെടുപ്പ് പ്രഖ്യാപിച്ചത്. 14 വർഷമായി അധികാരത്തില് തുടരുന്ന കണ്സർവേറ്റീവ് പാർട്ടി രാജ്യത്ത് വലിയ വിമർശനങ്ങള്ക്ക് വിധേയമാകുന്ന പശ്ചാത്തലത്തിലായിരുന്നു ഋഷി സുനകിന്റെ തിരഞ്ഞെടുപ്പ് പ്രഖ്യാപനം.
ഒക്ടോബർ – നവംബർ മാസങ്ങളിലായിരുന്നു സുനക് തിരഞ്ഞെടുപ്പ് പ്രഖ്യാപിക്കുമെന്ന് പ്രതീക്ഷിച്ചിരുന്നത്. എന്നാല് ഈ കാലയളവില് തന്റെ പാർട്ടിക്ക് ജനങ്ങള്ക്കിടയിലുള്ള സ്വാധീനത്തില് കാര്യമായ വ്യത്യാസമുണ്ടാക്കാന് സാധിക്കില്ലെന്ന് കരുതിയയായിരുന്നു പ്രഖ്യാപനമെന്നാണ് വിലയിരുത്തല്. 1945ന് ശേഷം ആദ്യമായാണ് ബ്രിട്ടനിൽ ജൂലൈയിൽ തെരഞ്ഞെടുപ്പ് നടക്കുന്നതെന്ന പ്രത്യേകതയും ഈ തിരഞ്ഞെടുപ്പിനുണ്ട്.
ഇന്ത്യൻ വംശജനായ റിഷി സുനക് 2022 ഒക്ടോബറിലാണ് പ്രധാനമന്ത്രി സ്ഥാനത്തേക്ക് എത്തിയത്. രണ്ടാം ലോക മഹായുദ്ധത്തിന് ശേഷമുള്ള ഏറ്റവും വലിയ പ്രതിസന്ധി കാലത്താണ് അധികാരത്തിൽ ഉണ്ടായിരുന്നതെന്നും, സമ്പദ്ഘടന ശക്തിപ്പെടുത്താൻ തനിക്ക് കഴിഞ്ഞെന്നും സുനക്ക് പ്രതികരിച്ചു. അതേസമയം, അഭിപ്രായസർവേകളിൽ പ്രതിപക്ഷമായ ലേബർ പാർട്ടിക്ക് നിലവിൽ വ്യക്തമായ മേൽക്കൈയുണ്ട്.