470 ദിവസം നീണ്ടുനിന്ന ഇസ്രായേലി വംശഹത്യയിൽ കൊല്ലപ്പെട്ട 205 പലസ്തീൻ പത്രപ്രവർത്തകരുടെയും മാധ്യമപ്രവർത്തകരുടെയും പട്ടിക ഗാസയിലെ ഗവൺമെന്റ് മീഡിയ ഓഫീസ് പുറത്തുവിട്ടു. പലസ്തീൻ ആഖ്യാനത്തെ അടിച്ചമർത്താനും സത്യം മായ്ച്ചുകളയാനുമുള്ള ശ്രമത്തിലാണ് ഇസ്രായേൽ മാധ്യമ പ്രവർത്തകരെ ലക്ഷ്യമിട്ടതെന്ന് പ്രസ്താവനയിൽ പറയുന്നു.
“വിശിഷ്ട സേവനത്തിനു ശേഷം രക്തസാക്ഷിത്വം വരിച്ച പത്രപ്രവർത്തകരെയും മാധ്യമപ്രവർത്തകരെയും ഓർത്ത്, വളരെ അഭിമാനത്തോടും ബഹുമാനത്തോടും കൂടി” എന്ന കുറിപ്പോടെയാണ് മീഡിയ ഓഫീസ് ലിസ്റ്റ് പുറത്ത് വിട്ടത്. “പലസ്തീൻ ആഖ്യാനത്തെ അടിച്ചമർത്താനും സത്യം മായ്ച്ചുകളയാനുമുള്ള ശ്രമത്തിൽ ഇസ്രായേൽ അധിനിവേശ സേന ഈ വീരന്മാരെ കൊലപ്പെടുത്തി. എന്നിരുന്നാലും, നമ്മുടെ മഹത്തായ ജനങ്ങളുടെ ഇച്ഛാശക്തി തകർക്കുന്നതിൽ അവർ പരാജയപ്പെട്ടു.” ഓഫീസ് കൂട്ടിച്ചേർത്തു.
ഗാസയിൽ ഇസ്രായേൽ നടത്തിയ വംശഹത്യ കഴിഞ്ഞ 30 വർഷത്തിനിടെ ലോകത്ത് മാധ്യമപ്രവർത്തകർക്കും പത്രപ്രവർത്തകർക്കും ഏറ്റവും ദുർഘടമായ ഒരു കാലമായി കണക്കാക്കപ്പെടുന്നു. വിദേശ റിപ്പോർട്ടർമാരെ ഗാസയിലേക്ക് പ്രവേശിക്കുന്നത് വിലക്കിയ ഇസ്രായേൽ, പലസ്തീൻ പ്രദേശത്തെ മാധ്യമപ്രവർത്തകരെ ലക്ഷ്യം വെക്കുന്നത് യുദ്ധക്കുറ്റങ്ങളെക്കുറിച്ചുള്ള സത്യം മറച്ചുവെക്കാനാണെന്ന് വിമർശകർ ആരോപിക്കുന്നു. ബുധനാഴ്ച പുറത്തിറക്കിയ വാർഷിക റിപ്പോർട്ടിൽ, കമ്മിറ്റി ടു പ്രൊട്ടക്റ്റ് ജേണലിസ്റ്റ്സ് (സിപിജെ) 2024 ൽ റെക്കോർഡ് എണ്ണം മാധ്യമപ്രവർത്തകർ കൊല്ലപ്പെട്ടുവെന്നും അതിൽ മൂന്നിൽ രണ്ട് ഭാഗത്തിലധികത്തിനും ഇസ്രായേലാണ് ഉത്തരവാദിയെന്നും പറയുന്നു.
സമീപകാല റിപ്പോർട്ടിൽ, ഇന്റർനാഷണൽ ഫെഡറേഷൻ ഓഫ് ജേണലിസ്റ്റ്സ് (IFJ) 2024-നെ “പ്രത്യേകിച്ച് രക്തരൂക്ഷിതമായ വർഷം” എന്ന് വിശേഷിപ്പിച്ചു. ഐഎഫ്ജെയുടെ വാർഷിക റിപ്പോർട്ട് അനുസരിച്ച്, 2024 ഡിസംബർ 10 ലെ കണക്കനുസരിച്ച്, ജനുവരി 1 മുതൽ ലോകമെമ്പാടുമായി 104 പത്രപ്രവർത്തകർ കൊല്ലപ്പെട്ടിട്ടുണ്ട്. അതിൽ പകുതിയിലധികവും ഗാസയിലാണ്. 2023-ൽ ലോകത്ത് കൊല്ലപ്പെട്ട എല്ലാ റിപ്പോർട്ടർമാരിൽ എഴുപത്തിയഞ്ച് ശതമാനവും ഒക്ടോബർ 7 നും കഴിഞ്ഞ വർഷം അവസാനത്തിനും ഇടയിൽ കൊല്ലപ്പെട്ടവരാണ്. മാധ്യമ പ്രവർത്തകർക്ക് ഏറ്റവും മോശം വർഷങ്ങളിലൊന്ന് എന്നാണ് 2024 നെ ഐഎഫ്ജെ സെക്രട്ടറി ജനറൽ ആന്റണി ബെല്ലാംഗർ വിശേഷിപ്പിച്ചത്. “മുഴുവൻ ലോകത്തിന്റെയും കൺമുന്നിൽ പലസ്തീനിൽ നടക്കുന്ന കൂട്ടക്കൊലയെ” അദ്ദേഹം അപലപിച്ചു.
റിപ്പോർട്ടേഴ്സ് വിത്തൗട്ട് ബോർഡേഴ്സ് (ആർഎസ്എഫ്) പുറത്തിറക്കിയ മറ്റൊരു റിപ്പോർട്ടിൽ, ഫലസ്തീൻ മാധ്യമപ്രവർത്തകർക്ക് ഏറ്റവും അപകടകരമായ രാജ്യമാണെന്നും കഴിഞ്ഞ അഞ്ച് വർഷത്തിനിടെ മറ്റേതൊരു രാജ്യത്തേക്കാളും ഉയർന്ന മരണസംഖ്യയാണ് രേഖപ്പെടുത്തിയിരിക്കുന്നതെന്നും പറഞ്ഞു. ഡിസംബർ 1 വരെയുള്ള ഡാറ്റ റിപ്പോർട്ടിൽ ഉൾപ്പെടുത്തിയിട്ടുണ്ട്.