ഇറാന്റെ പരമോന്നത നേതാവ് മൊജ്തബ ഖമേനി അബോധാവസ്ഥയിലാണെന്നും ഖോം നഗരത്തിൽ അടിയന്തര വൈദ്യചികിത്സ തേടിയിരിക്കുകയാണെന്നും റിപ്പോർട്ടുകൾ. അദ്ദേഹത്തിന്റെ ആരോഗ്യനില ഗുരുതരമാണെന്ന് യുഎസ്-ഇസ്രയേൽ ഇന്റലിജൻസ് വിവരങ്ങളെ ഉദ്ധരിച്ച് ‘ദി ടൈംസ്’ റിപ്പോർട്ട് ചെയ്തു.
യുഎസ്-ഇസ്രയേൽ ഇന്റലിജൻസ് വിവരങ്ങളുടെ അടിസ്ഥാനത്തിൽ സഖ്യകക്ഷികളുമായി പങ്കുവെച്ച ഒരു നയതന്ത്ര കുറിപ്പിലാണ് മൊജ്തബയുടെ ആരോഗ്യനിലയെക്കുറിച്ച് വിശദീകരിക്കുന്നതെന്നാണ് റിപ്പോർട്ട്. ഗുരുതരാവസ്ഥയിൽ ചികിത്സയിലായതിനാൽ പുതിയ പരമോന്നത നേതാവായി തിരഞ്ഞെടുത്തിട്ടും അദ്ദേഹത്തിന് തീരുമാനങ്ങളെടുക്കാൻ പോലും കഴിയാത്ത സ്ഥിതിയാണെന്നാണ് റിപ്പോർട്ട്.
അധികാരമേറ്റതിനുശേഷം, ഖമേനി ഇന്നുവരെ പൊതുവേദികളിൽ പ്രത്യക്ഷപ്പെട്ടിട്ടില്ല. ഇതാണ് അദ്ദേഹത്തിന്റെ ജീവിതത്തെക്കുറിച്ച് ചോദ്യങ്ങൾ ഉയർത്തിയത്. ഫെബ്രുവരി 28 ലെ ആക്രമണത്തിൽ ഖമേനിക്ക് പരിക്കേറ്റതായി സ്ഥിരീകരിച്ചിട്ടുണ്ടെങ്കിലും, നിലവിൽ ഇറാന്റെ ചുമതല വഹിക്കുന്നതും നിലവിലുള്ള പശ്ചിമേഷ്യൻ സംഘർഷത്തിൽ രാജ്യത്തിന്റെ നടപടിയുടെ ഗതി തീരുമാനിക്കുന്നതിൽ അദ്ദേഹത്തിന് പങ്കുണ്ടെന്നും ഇറാൻ ഉദ്യോഗസ്ഥർ പലതവണ പരാമർശിച്ചു.