തന്റെ മിടുക്ക് കൊണ്ടല്ല മാര്പാപ്പയായതെന്ന് ലിയോ പതിനാലാമാന് മാര്പാപ്പ. ദൈവ സ്നേഹത്തിന്റെ വഴിയില് നിങ്ങള്ക്കൊപ്പം നടക്കാന് ആഗ്രഹിക്കുന്നുവെന്ന് പറഞ്ഞ മാർപാപ്പ ഐക്യത്തിലും സ്നേഹത്തിലും മുന്നോട്ടുപോകണമെന്നും മനുഷ്വത്വമാകണം സഭയുടെ മാനദണ്ഡമെന്നും പറഞ്ഞു. കത്തോലിക്കാ സഭയുടെ പുതിയ മാർപാപ്പയായി സ്ഥാനം ഏറ്റെടുക്കവെയാണ് മാർപാപ്പ ഇക്കാര്യം അറിയിച്ചത്.
ആഗോള കത്തോലിക്കാ സഭയുടെ 267ാമത് മാര്പാപ്പയായാണ് ലിയോ പതിനാലാമൻ സ്ഥാനമേറ്റത്. മുക്കുവന്റെ മോതിരവും പാലിയവും സ്വീകരിച്ചുകൊണ്ടാണ് സ്ഥാനമേറ്റെടുത്തത്. രണ്ടു മണിക്കൂറോളം നീണ്ടു നിന്ന ചടങ്ങുകള്ക്കൊടുവിലാണ് ലിയോ പതിനാലാമൻ മാര്പാപ്പയായി സ്ഥാനമേറ്റത്. സമാധാനം പുലരുന്ന നവ ലോകത്തിന് ആഹ്വാനം ചെയ്ത് ലിയോ പതിനാലാമാന് മാര്പാപ്പ ലോകത്തെ അഭിസംബോധന ചെയ്തു. സ്നേഹവും ഐക്യവും പ്രധാനമാണെന്ന് മാര്പാപ്പ വ്യക്തമാക്കി. വിവിധ മതസ്ഥരുമായുള്ള സ്നേഹം പ്രധാനമാണെന്നും പറഞ്ഞു.
വിശുദ്ധ പത്രോസിന്റെ ഖബറിടത്തിലെത്തി പ്രാര്ഥിച്ചതിന് ശേഷമാണ് സെന്റ് പീറ്റേഴ്സ് ബസിലിക്ക ചത്വരത്തില് സ്ഥാനാരോഹണ ചടങ്ങ് തുടങ്ങിയത്. ഇന്ത്യൻ സമയം ഉച്ചയ്ക്ക് 1.30നാണ് ചങ്ങുകള് ആരംഭിച്ചത്. മൂന്നരയോടെ കുര്ബാന ചടങ്ങുകള് പൂര്ത്തിയായി. സെന്റ് പീറ്റേഴ്സ് ചത്വരത്തിലെ പ്രധാന വേദിയിലാണ് ചടങ്ങുകള് നടന്നത്. ലിയോ പതിനാലാമൻ മാര്പാപ്പയുടെ കാര്മികത്വത്തിലാണ് സെന്റ് പീറ്റേഴ്സ് ചത്വരത്തിൽ കുര്ബാന നടന്നു. കുര്ബാനമധ്യേ വലിയ ഇടയന്റെ വസ്ത്രവും സ്ഥാനമോതിരവും മാര്പാപ്പ ഏറ്റുവാങ്ങി. കുര്ബാനയ്ക്കൊടുവിൽ പത്രോസിന്റെ പിന്ഗാമിയായി മാര്പാപ്പ സഭയുടെ സാരഥ്യം ഏറ്റെടുത്തു.