ബംഗ്ലാദേശിലെ കലാപത്തിനിടെ നിയമപാലകരില്നിന്ന് കൊള്ളയടിച്ചതും മറ്റുമായ അനധികൃത തോക്കുകള് ആഗസ്റ്റ് 19നകം അടുത്തുള്ള പൊലീസ് സ്റ്റേഷനില് തിരിച്ചേല്പിക്കണമെന്ന് ബംഗ്ലാദേശിലെ ഇടക്കാല സര്ക്കാര്. 19നുശേഷം ആയുധങ്ങള്ക്കായി വ്യാപക തിരച്ചില് നടത്തുമെന്ന് ആഭ്യന്തര മന്ത്രാലയ ഉപദേശകന് റിട്ട. ബ്രിഗേഡിയര് ജനറല് സഖാവത് ഹുസൈന് അറിയിച്ചു.
അതേസമയം, ബംഗ്ലാദേശില് കലാപം രൂക്ഷമായതോടെ ന്യൂനപക്ഷ വിഭാഗങ്ങള് ഇന്ത്യയിലേക്ക് പാലായനം ചെയ്യാനുള്ള ശ്രമങ്ങള് ആരംഭിച്ചു. ഹിന്ദു-ക്രിസ്ത്യന് സമുദായ അംഗങ്ങളാണ് ഇന്ത്യന് അതിര്ത്തികളില് അഭയം തേടിയിരിക്കുന്നത്. ഇങ്ങനെ പശ്ചിമ ബംഗാള്, ത്രിപുര, മേഘാലയ എന്നിവിടങ്ങളിലെ അതിര്ത്തികള് വഴി ഇന്ത്യയിലേക്ക് നുഴഞ്ഞുകയറാന് ശ്രമിച്ച 11 ബംഗ്ലാദേശ് പൗരന്മാരെ അതിര്ത്തി രക്ഷാസേന പിടികൂടി.ആയിരത്തിലധികം പേര് ഇന്ത്യന് അതിര്ത്തിയില് കാത്തുകിടക്കുകയാണെന്ന് ബിഎസ്എഫ് വ്യക്തമാക്കി.
ഇവരെ ചോദ്യം ചെയ്യുകയാണെന്നും നിയമനടപടികള്ക്കായി സംസ്ഥാന പൊലീസിന് കൈമാറുമെന്നും സേനാ വക്താവ് അറിയിച്ചു. ലോകത്തിലെ അഞ്ചാമത്തെ ദൈര്ഘ്യമേറിയ കര അതിര്ത്തിയാണ് ഇന്ത്യയും ബംഗ്ലാദേശും തമ്മിലുള്ളത്. ഇരുരാജ്യങ്ങളും 4096 കിലോമീറ്റര് അതിര്ത്തി പങ്കിടുന്നു. ബംഗ്ലാദേശിലെ സംഘര്ഷാവസ്ഥയുടെ പശ്ചാത്തലത്തില് സ്ഥിതി നിരീക്ഷിക്കാന് കേന്ദ്ര സര്ക്കാര് അതിര്ത്തി സുരക്ഷാ സേന (ബി.എസ്.എഫ്) അഡീഷനല് ഡയറക്ടര് ജനറലിന്റെ നേതൃത്വത്തില് ഉന്നതതല സമിതി രൂപവത്കരിച്ചിട്ടുണ്ട്.
പശ്ചിമ ബംഗാള്, ത്രിപുര അതിര്ത്തികളില്നിന്ന് രണ്ടുപേരെ വീതവും മേഘാലയ അതിര്ത്തിയില്നിന്ന് ഏഴുപേരെയുമാണ് പിടികൂടിയത്. അസം, ത്രിപുര, മിസോറാം, മേഘാലയ, പശ്ചിമ ബംഗാള് സംസ്ഥാനങ്ങളാണ് ബംഗ്ലാദേശുമായി അതിര്ത്തി പങ്കിടുന്നത്. അയല്രാജ്യത്തെ സംഘര്ഷ സാഹചര്യവും ഇന്ത്യന് സ്വാതന്ത്ര്യദിനം അടുത്തുവരുന്നതും പരിഗണിച്ച് അതിര്ത്തിയില് ജാഗ്രതയിലാണ്. അനധികൃതമായി ഇന്ത്യയിലേക്ക് പ്രവേശിക്കാന് ആരെയും അനുവദിക്കരുതെന്ന് കേന്ദ്രം നിര്ദേശം നല്കി.