ഇന്സ്റ്റാഗ്രാമില് നിന്ന് 63,000 അക്കൗണ്ടുകള് നീക്കം ചെയ്ത് മെറ്റ. സൈബര് കുറ്റകൃത്യങ്ങള് തടയാന് ലക്ഷ്യമിട്ടാണ് വ്യാപകമായി അക്കൗണ്ടുകള് നീക്കം ചെയ്തത്. നീക്കം ചെയ്ത അക്കൗണ്ടുകളില് 2500 അക്കൗണ്ടുകള് 20 വ്യക്തികളുടേതാണെന്നാണ് റിപ്പോര്ട്ടുകള്. സൈബര് കുറ്റകൃത്യങ്ങള്ക്കായി നിര്മ്മിച്ച വ്യാജ അക്കൗണ്ടുകളാണ് നീക്കം ചെയ്തത്.
നൈജീരിയ കേന്ദ്രമായി പ്രവര്ത്തിക്കുന്ന ഹണി ട്രാപ്പ് സംഘങ്ങളുമായി ബന്ധപ്പെട്ട അക്കൗണ്ടുകളാണ് നീക്കം ചെയ്തവയില് ഏറെയും. യാഹൂ ബോയ്സ് എന്ന സൈബര് കുറ്റവാളികളുടെ സംഘങ്ങളെ കേന്ദ്രീകരിച്ചായിരുന്നു മെറ്റയുടെ നടപടി. വ്യാജ അക്കൗണ്ടുകള് യുഎസിലെ യുവാക്കളെ ലക്ഷ്യമിട്ടതായും മെറ്റ അറിയിച്ചു.
ഇതിന് പുറമേ സ്കാം ടിപ്പുകളും വ്യാജ ഫോട്ടോകളും പ്രചരിപ്പിച്ച ആയിരക്കണക്കിന് ഫേസ്ബുക്ക് അക്കൗണ്ടുകളും ഗ്രൂപ്പുകളും പേജുകളും മെറ്റ നീക്കം ചെയ്തു. തട്ടിപ്പുകള്ക്ക് ഇരയായവരില് പ്രായപൂര്ത്തിയാകാത്ത നിരവധി കുട്ടികള് ആത്മഹത്യ ചെയ്തിരുന്നു. ഈ സാഹചര്യത്തിലാണ് മെറ്റ വ്യാപകമായി അക്കൗണ്ടുകള് നീക്കം ചെയ്തത്.