കോവിഡ് വ്യാപനത്തിനു പിന്നാലെ ഉത്തരകൊറിയയിൽ പുതിയ പകർച്ച വ്യാധി പടരുന്നു. രോഗം കുടലിനെ ബാധിക്കുന്നതായാണ് റിപ്പോർട്ട്. എത്ര പേർക്ക് രോഗം ബാധിച്ചെന്നോ, എങ്ങനെയാണ് രോഗം പകർന്നതെന്നോ സംബന്ധിച്ച ഔദ്യോഗിക വിവരളൊന്നും ഇതുവരെ പുറത്തു വിട്ടിട്ടില്ല.
രോഗ വ്യാപനം തടയുന്നതിന്റെ ഭാഗമായി ഭരണാധികാരി കിം ജോങ് ഉൻ തന്റെ വ്യക്തിപരമായ ആവശ്യങ്ങൾക്ക് മാറ്റി വെച്ച മരുന്നുകളും സംഭാവന ചെയ്യ്തതായാണ് റിപ്പോർട്ട്. ഉത്തരകൊറിയയിൽ സാധാരണയായി കോളറ, ടെെഫോയ്ഡ് തുടങ്ങിയ രോഗങ്ങൾ പടർന്നു പിടിക്കാറുണ്ട്. ഇത്തരത്തിൽ ഏതെങ്കിലും രോഗമായിരിക്കാം പടർന്നു പിടിച്ചതെന്നും നിരീക്ഷകർ അഭിപ്രായപ്പെടുന്നു.
ഉത്തരകൊറിയയിലെ ഒരു പത്രത്തിന്റെ ആദ്യ പേജിൽ കിമ്മും അദ്ദേഹത്തിന്റെ ഭാര്യ റി സൊൽ ജുവും സംഭാവന ചെയ്യുന്ന മരുന്നുകൾ പരിശോധിക്കുന്ന ചിത്രം പ്രസിദ്ധീകരിച്ചിട്ടുണ്ട്. അതേസമയം നിലവിലെ പകർച്ച വ്യാധി എത്രമാത്രം ഗുരുതരമാണെന്ന കാര്യത്തിൽ വ്യക്തത വന്നിട്ടില്ല.
ദക്ഷിണ കൊറിയയിൽ നിന്നുള്ള ചാര ഏജൻസികൾ നടത്തിയ അന്വേഷണത്തിൽ ഉത്തരകൊറിയയിൽ കഴിഞ്ഞ മാസം പനി സംബന്ധമായ രോഗലക്ഷണങ്ങളോടെ നിരവധി പേർ ചികിത്സ തേടിയിട്ടുണ്ട്. ഇതിൽ പലർക്കും അഞ്ചാം പനി, ടൈഫോയ്ഡ് തുടങ്ങിയവയാണെന്നാണ് ഈ ഏജൻസികൾ പറയുന്നത്.