ദക്ഷിണ കൊറിയയില് ലാന്ഡിങ്ങിനിടെ ഉണ്ടായ വിമാനാപകടത്തിൽ മരണം 85 ആയി. 175 യാത്രക്കാർ അടക്കം 181 പേരുമായി ബാങ്കോക്കില് നിന്നുമെത്തിയ ജെജു വിമാനമാണ് ലാൻഡ് ചെയ്യാൻ ശ്രമിക്കുന്നതിനിടെ ദക്ഷിണ കൊറിയയിലെ മുവാന് രാജ്യാന്തര വിമാനത്താവളത്തില് തകർന്നത്. വിമാനം റണ്വേയില് നിന്ന് തെന്നിമാറി സുരക്ഷാ വേലിയിലിടിക്കുക ആയിരുന്നു. അപകടത്തിന്റെ വീഡിയോ ദൃശ്യങ്ങൾ പുറത്ത് വന്നിട്ടുണ്ട്.
ഇതുവരെ 85 പേരുടെ മരണം സ്ഥിരീകരിച്ചതായി വാര്ത്താ ഏജന്സികള് റിപ്പോര്ട്ട് ചെയ്തു. രക്ഷാപ്രവര്ത്തനം നടന്നുവരികയാണ്. വിമാനത്തിലെ 175 യാത്രക്കാരില് 173 പേര് ദക്ഷിണ കൊറിയന് പൗരന്മാരും രണ്ടുപേര് തായ്ലന്ഡ് സ്വദേശികളുമാണെന്ന് അധികൃതര് അറിയിച്ചു. അപകടത്തില്പ്പെട്ട വിമാനത്തിന്റെ ചിത്രങ്ങള് പ്രാദേശിക മാധ്യമങ്ങള് പങ്കുവെച്ചിട്ടുണ്ട്.
പ്രാദേശിക സമയം രാവിലെ 09.07നായിരുന്നു അപകടം. തായ്ലന്ഡിലെ ബാങ്കോക്കില് നിന്ന് പുറപ്പെട്ട വിമാനം തെക്കുപടിഞ്ഞാറന് തീരദേശ വിമാനത്താവളമായ മുവാനില് ലാന്ഡ് ചെയ്യാന് ശ്രമിക്കുന്നതിനിടെയായിരുന്നു അപകടം. റണ്വേയില് നിന്ന് തെന്നിമാറിയ വിമാനം സുരക്ഷാവേലിയില് ഇടിച്ച് കത്തിയമരുകയായിരുന്നു.
വിമാനത്തിന്റെ ലാന്ഡിങ്ങിന് പ്രശ്നം സൃഷ്ടിച്ച കാരണം എന്താണെന്ന് വ്യക്തമായിട്ടില്ല. വിമാനത്തിന്റെ ലാന്ഡിങ് ഗിയറിന് തകരാര് സംഭവിച്ചതായാണ് പ്രാദേശിക മാധ്യമങ്ങള് റിപ്പോര്ട്ട് ചെയ്യുന്നത്. ദൃശ്യങ്ങള് നല്കുന്ന സൂചനകള് വിരല്ചൂണ്ടുന്നതും ലാന്ഡിങ് ഗിയര് തകരാറിലേക്കാണ്.